Andijonda hokimlik vakili noqonuniy ravishda o‘zlashtirgan binoni buzib tashlab, qurilish materiallarini 760 mln so‘mga sotib yuborgani ma’lum qilindi

O‘zbekiston bosh prokurori Nig‘matilla Yo‘ldoshev raisligida korrupsiya holatlari kuzatilayotgan sohalar hamda vazirlik va idoralarda buning sabab va shart-sharoitlariga bag‘ishlangan idoralararo yig‘ilish bo‘lib o‘tdi. Unda ayrim xodimlar tadbirkorlarga yordam berish o‘rniga, ulardan tamagirlik qilib, pul undirayotganligi ta’kidlandi.

So‘nggi 2 yilda 95 nafar hokimlik xodimlari korrupsiyaviy jinoyatlari uchun javobgarlikka tortilgan. Bu xodimlar asosan Qoraqalpog‘iston, Andijon, Xorazm, Qashqadaryo, Farg‘ona, Jizzax, Surxondaryo, Toshkent viloyati va Toshkent shahri hisobiga to‘g‘ri keladi.

Vaziyat shu darajagacha borganki, hokimliklarning korrupsiya aralashmagan birorta sohasi va yo‘nalishi qolmaganligi ta’kidlandi.

Misol uchun, Surxondaryo viloyat hokimligi bo‘limi boshlig‘i Ibrohimjonov Sho‘rchi tuman hokimligi bosh mutaxassisi Tilavov orqali tadbirkor Bekmurodovdan 1 milliard so‘m imtiyozli kredit olishida yordam berganligi uchun 2 ming dollarni talab qilib olgan.

Bo‘stonliq tumani hokimi o‘rinbosari Abduraimov “Golden Dream Land” jamiyati Nosirovadan buzilgan bino inshooti uchun 298 million so‘m kompensatsiya pulini to‘lab berishi evaziga 15 million so‘mni olgan vaqtida ushlangan.

Yig‘ilishda bo‘sh binolarni tadbirkorlikka jalb qilish borasida ham turli qonun buzilishlarga yo‘l qo‘yilayotgani ta’kidlandi. Bugungi kunda Respublika bo‘yicha bo‘sh turgan 254 ta davlat obyektlaridan 100 tasi hokimliklarga o‘tkazilgan bo‘lsada, shu kungacha realizatsiya qilinmagan va davlat xususiy sherikchilik asosida tadbirkorlarga berilmasdan qolmoqda. Ayrim hokimlik mas’ullari esa bundan o‘z manfaatlari yo‘lida foydalanayotgani aytildi.

Xususan, Andijon viloyati hokimligi mutaxassisi Qurbonov muqaddam mulkni talon-toroj qilish jinoyatlari uchun sudlangan Abbosov va Mirzayev bilan jinoiy til biriktirib, soxta hujjatlar bilan Shahrixon tuman Silga qarshi kurashish dispanseri binosini nol xarid qiymatida qo‘lga kiritgan. Bunda u Abbosov nomiga soxta tadbirkorlik subyektini 1,6 milliard so‘mlik investitsiya kiritish majburiyati va 75 ta yangi ish o‘rni yaratish sharti bilan binoni qo‘lga kiritgan. Keyinchalik binoda hech qanday tadbirkorlikni yo‘lga qo‘ymasdan, uni fuqaro Mirzakarimovga 30 ming dollarga sotishga kelishib, 11 ming dollarini olgan. Ammo binoni unga ham bermasdan, buzib, qurilish materiallarini 760 million so‘mga sotib yuborgan.