Ўзбекистон бош прокурори Ниғматилла Йўлдошев раислигида коррупция ҳолатлари кузатилаётган соҳалар ҳамда вазирлик ва идораларда бунинг сабаб ва шарт-шароитларига бағишланган идоралараро йиғилиш бўлиб ўтди.
Йиғилишда олий таълим тизимида ҳам коррупцияни келтириб чиқарувчи омиллар тўлиқ бартараф этилмаганлиги ҳам кўрсатиб ўтилди.
Қайд этилишича, 2020 йилнинг ўтган 9 ойда тизимдаги 70 нафар ходимлар таълим жараёни билан боғлиқ жиноятларни содир қилган. Тизимда энг кўп кузатилаётган коррупция ўқишга киритиш масаласи билан боғлиқ бўлиб қолмоқда.
Нострификация жараёнида коррупциявий омиллар танқид остига олинди.
2020 йилда Вазирлар Маҳкамаси ҳузуридаги Таълим сифатини назорат қилиш давлат инспекцияси бошлиғининг ёрдамчиси Шукуров шериклари орқали 4 нафар фуқародан хорижий дипломларни нострификация қилиб бериш эвазига жами 6500 доллар олганда ушланган. Ҳозирда улар суд олдида жавоб бермоқда.
Шунингдек, Таълим сифатини назорат қилишга масъул идорага хорижий дипломни нострификация қилиш, яъни бошқарув идораси функциясининг берилиши коррупциянинг олдини олиш имконини чеклаши таъкидланди.
Аввалроқ бош прокурор ўтган икки йилда молия органларининг 41 нафар ходими коррупция ҳолатлари учун жиноий жавобгарликка тортилгани, «Халқ банки» собиқ раҳбари тузган жиноий гуруҳ аниқлангани, Арнасой, Юнусобод, Бувайда ҳокимлари ўринбосарлари ер ажратиб бериш эвазига пора олгани ва Тўрақўрғон бандликка кўмаклашиш маркази директори пандемия даврида 325,5 миллион сўм маблағни талон-торож қилгани ҳақида маълум қилганди.
Изоҳ (0)