Futbol bo‘yicha La Liga 9-turida “Barselona” 7-noyabr, shanba kuni “Betis”ni qabul qildi.
Uchrashuvning 22-daqiqasida Usmon Dembele jamoasining uzoq davom etgan hujumini muvaffaqiyatli yakunladi. Oradan o‘n daqiqa o‘tib katalonlar ikkinchi golini urishi ham mumkin edi, biroq Antuan Grizmann penaltidan unumli foydalana olmadi. Birinchi bo‘limga qo‘shib berilgan vaqtda “Barselona” tarbiyalanuvchisi hisoblangan Antonio Sanabriya hisobni tenglashtirdi.
Ikkinchi bo‘limni faol boshlagan mezbonlar tezkor gol urishga muvaffaq bo‘ldi. 49-daqiqada Antuan Grizmann qanotdan uzatib berilgan to‘pni bo‘sh qolgan darvozaga joylab qo‘ydi. 60-daqiqada “Betis” futbolchisi Aissa Mandi darvoza tomon ketayotgan to‘pni qo‘li bilan to‘sib qoldi. Natijada hakam videotakrorlardan keyin Mandiga qizil kartochka ko‘rsatdi va penalti belgiladi. 11 metrlik jarima zarbasini Lionel Messi muvaffaqiyatli ijro etdi.
73-daqiqada Loren Moron mehmonlarning ikkinchi golini urdi. 82-daqiqada Messi Serxi Robertoning chiroyli pasidan keyin dublini nishonlagan bo‘lsa, asosiy vaqtning so‘nggi daqiqasida Pedri yakuniy hisobni o‘rnatdi — 5:2.
Ushbu g‘alabadan keyin Ronald Kuman shogirdlari 11 ochko bilan 8-o‘ringa ko‘tarildi. “Betis” (12) 7-pog‘onada qoldi.
La Liga
9-tur bahsi
7-noyabr, shanba
“Barselona” — “Betis” 5:2
Gollar: 1:0 – 22 Dembele, 1:1 – 45 Sanabriya, 2:1 – 49 Grizmann, 3:1 – 61, penalti Messi, 3:2 – 73 Moron, 4:2 – 82 Messi, 5:2 – 90 Pedri.“Barselona”: ter Shtegen, Alba, Serxi Roberto, Langle, Pike, Pedri, de Yong, Dembele (Trinkau, 66), Buskets (Pyanich, 86), Fati (Messi, 46), Grizmann (Breytueyt, 78).
“Betis”: Bravo, Bartra, Emerson, Mandi, Moreno, Rodriges, Vilyam Karvalyu, Xoakin (Ruibal, 63), Kanales (Rodri, 86), Telo (Ruis, 63), Sanabriya (Moron, 71).
Ogohlantirishlar: Mandi (32), Fati (37), Pedri (41), Moreno (45).
Chetlatish: Mandi (60).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)