Boks bo‘yicha o‘rta vazn toifasida Jahon chempioni Saul “Kanelo” Alvares Oskar de la Xoyaga tegishli Golden Boy promouterlik kompaniyasi bilan hamkorlikni to‘xtatdi.
Bu haqida meksikalik bokschining murabbiyi va menejeri Eddi Reynoso ma’lum qildi.
“Saul Alvaresning menejeri va murabbiyi sifatida ushbu ma’lumotni e’lon qilishni o‘zimga lozim topdim — 6-noyabr kuni Alvares erkin agentga aylandi. Biz faoliyatimizni davom ettirishga tayyormiz. Hamma vaqt tartibga rioya qilgan holda mashg‘ulot zalida ter to‘kdik.
Yaqin orada navbatdagi raqib va jang sanasini ma’lum qilamiz. Biz yanada kuchli bo‘lib qaytamiz, o‘sishda davom etamiz va Meksika boksi dunyodagi eng zo‘ri ekanini isbotlashni xohlaymiz”, — deydi Reynoso.
Avvalroq Kanelo Golden Boy va DAZN kompaniyalarini sudga bergan va ulardan 280 mln dollar kompensatsiya talab qilgandi.
Alvares 2019-yilning noyabr oyida bo‘lib o‘tgan so‘nggi jangida WBO yo‘nalishi bo‘yicha yarim og‘ir vazn toifasida jahon chempionligi uchun kurashda Sergey Kovalyovni mag‘lubiyatga uchratgandi.
Eslatib o‘tamiz, Golden Boy kompaniyasi bilan Bektemir Meliqo‘ziyev va Murodjon Ahmadaliyev kabi o‘zbekistonlik bokschilar hamkorlik qiladi.
Izoh (0)