Футбол бўйича Ла Лига 9-турида «Барселона» 7 ноябрь, шанба куни «Бетис»ни қабул қилди.
Учрашувнинг 22-дақиқасида Усмон Дембеле жамоасининг узоқ давом этган ҳужумини муваффақиятли якунлади. Орадан ўн дақиқа ўтиб каталонлар иккинчи голини уриши ҳам мумкин эди, бироқ Антуан Гризманн пенальтидан унумли фойдалана олмади. Биринчи бўлимга қўшиб берилган вақтда «Барселона» тарбияланувчиси ҳисобланган Антонио Санабрия ҳисобни тенглаштирди.
Иккинчи бўлимни фаол бошлаган мезбонлар тезкор гол уришга муваффақ бўлди. 49-дақиқада Антуан Гризманн қанотдан узатиб берилган тўпни бўш қолган дарвозага жойлаб қўйди. 60-дақиқада «Бетис» футболчиси Аисса Манди дарвоза томон кетаётган тўпни қўли билан тўсиб қолди. Натижада ҳакам видеотакрорлардан кейин Мандига қизил карточка кўрсатди ва пенальти белгилади. 11 метрлик жарима зарбасини Лионель Месси муваффақиятли ижро этди.
73-дақиқада Лорен Морон меҳмонларнинг иккинчи голини урди. 82-дақиқада Месси Серхи Робертонинг чиройли пасидан кейин дублини нишонлаган бўлса, асосий вақтнинг сўнгги дақиқасида Педри якуний ҳисобни ўрнатди — 5:2.
Ушбу ғалабадан кейин Рональд Куман шогирдлари 11 очко билан 8-ўринга кўтарилди. «Бетис» (12) 7-поғонада қолди.
Ла Лига
9-тур баҳси
7 ноябрь, шанба
«Барселона» — «Бетис» 5:2
Голлар: 1:0 – 22 Дембеле, 1:1 – 45 Санабрия, 2:1 – 49 Гризманн, 3:1 – 61, пенальти Месси, 3:2 – 73 Морон, 4:2 – 82 Месси, 5:2 – 90 Педри.«Барселона»: тер Штеген, Альба, Серхи Роберто, Лангле, Пике, Педри, де Йонг, Дембеле (Тринкау, 66), Бускетс (Пьянич, 86), Фати (Месси, 46), Гризманн (Брэйтуэйт, 78).
«Бетис»: Браво, Бартра, Эмерсон, Манди, Морено, Родригес, Вильям Карвалью, Хоакин (Руибаль, 63), Каналес (Родри, 86), Тело (Руис, 63), Санабрия (Морон, 71).
Огоҳлантиришлар: Манди (32), Фати (37), Педри (41), Морено (45).
Четлатиш: Манди (60).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)