Yevropa ittifoqi mamlakatlarining doimiy vakillari Bryusselda Belarusning yuqori martabali amaldorlariga qarshi sanksiyalar qo‘llashni kelishib oldi. Bu haqda “TASS” xabar bergan.
Diplomatlardan birining aytishicha, yangi qora ro‘yxatga Belarus prezidenti Aleksandr Lukashenko ham kiritilgan. Rasmiy qaror Yevroittifoq kengashi tomonidan yaqin kunlarda chiqariladi.
“Radio Svoboda” jurnalisti Rikard Yozvyak Lukashenkodan tashqari, yana 14 nafar kishining sanksiyalar ro‘yxatiga kirganini qayd etgan. Ularning Yevropadagi aktivlari muzlatib qo‘yiladi va Yevroittifoq hududiga chiqishi taqiqlanadi.
Oktabr boshida Yevroittifoq prezidentlik saylovlaridagi natijalarni qalbakilashtirgani va norozilik namoyishi o‘tkazayotgan fuqarolarga kuch ishlatgani uchun 40 nafar Belarus amaldorlariga nisbatan sanksiyalar joriy qilgandi. O‘shanda Lukashenko ro‘yxatga kiritilmagan, Bryussel ushbu qarorni Minsk bilan muzokaralarning tiklanishiga umid berishini ma’lum qilgandi.
Oktabr o‘rtalarida Yevroittifoq Belarusdagi vaziyat o‘zgarmasa, Lukashenkoga nisbatan sanksiyalar qo‘llanishini bildirgan.
Izoh (0)