Daniya hukumati rahbari Mette Frederiksen hamda vazirlar mahkamasining 13 nafar a’zosi masofadan turib ishlash tartibiga o‘tmoqda va Adliya vazirida koronavirus tasdiqlangani tufayli COVID-19 bor yoki yo‘qligini aniqlash uchun test topshiradi. Bu haqda Eurointegration xabar bergan.
Daniya adliya vaziri Nik Xekkerup 3-noyabr kuni koronavirusga topshirgan testining natijasi musbat bo‘lib chiqqani va kasallik alomatlari o‘zida kuzatilayotganini ma’lum qilgandi.
U oxirgi marta hukumatdagi hamkasblari bilan o‘tgan haftada shaxsan uchrashgan. Daniya bosh vaziri matbuot xizmati uchrashuvda hukumatning hamma a’zolari karantin me’yorlariga qat’iy amal qilganini bildirgan.
Adliya vazirining bayonotidan keyin Konservatorlar muxolifat partiyasi yetakchisi Soren Pape ham o‘zi koronavirusga topshirgan testning natijasi ijobiy ekanini aytgan.
Daniyada 3-noyabrda kasallanishlar soni bo‘yicha yangi antirekord o‘rnatilgan – 1353 ta holat kuzatilgan. Mamlakat aholisining umumiy soni 5,8 millionni tashkil qiladi.
Daniyada oktabr oxirida epidemiologik vaziyat yomonlashgani sabab tibbiy niqobda yurish rejimi joriy etilgan va 10 nafardan ko‘p odamlarning ko‘chalarda, jamoat joylarida to‘planishi taqiqlab qo‘yilgan.
Bir necha kun avval JSST rahbari COVID-19’ga chalingan bemor bilan muloqotda bo‘lgani tufayli o‘z-o‘zini yakkalash tartibiga o‘tgandi.
Izoh (0)