Демократлар партиясидан АҚШ президентлигига номзод Жо Байден сайловларда муҳим аҳамиятга эга штатлардан бири — Висконсинда ғолиб чиқди, деб хабар беради Associated Press.
The New York Times ва NBC News маълумотларига кўра, Байден сайловчиларнинг 49,4 фоиз овозига эга бўлган, унинг рақиби Трамп эса 48,8 фоиз. Fox News’нинг маълум қилишича, Байден Висконсинда 49,6 фоиз овоз тўплаган бўлса, Трампда ушбу кўрсаткич — 49 фоиз. Таъкидланишича, номзодлар ўртасидаги фарқ 0,624 фоизни ташкил этган.
Шунингдек, Байден АҚШнинг муҳим штатларидан бири ҳисобланувчи Мичиганда ҳам ғолиб бўлган. Бу ҳақда Bloomberg 99 фоиз бюллетенлар ҳисоб-китобига таяниб, хабар берди.
Демократлар партияси номзоди штатда сайловчиларнинг 16 та овозига эга бўлган. CNN маълумотларга кўра, ҳозирда Байденда 253 та овоз бор, Трампда эса 213 та. Президентлик сайловларида ғалаба қозониш учун эса 270 та овоз тўплаш керак.
Шу билан бирга, Трамп ўзини Мичиганда ғолиб бўлган деб ҳисобламоқда. Бундан ташқари, амалдаги президент Пенсильвания, Шимолий Каролина ва Жоржияда ҳам етакчилик қилаётганини маълум қилган.
Юқоридаги штатларнинг барчаси президентлик пойгасида зиддиятли ва ҳал қилувчи ҳисобланади. Трампнинг жамоаси Висконсин, Мичиган ва Пенсильваниядаги овозларнинг дастлабки ҳисоб-китобларидан норози. Ҳозирда сўнгги икки штат судига даъволар жўнатилган бўлиб, унда Республикачилар партияси вакилларининг сайлов қутиларини очиш ва бюллетеларни санашда иштирок этиши учун шароит яратиб берилмагани кўрсатилган.
Изоҳ (0)