1980-yillar oxirida Janubiy Koreyaning Xvason shahrida bir nechta vahshiyona qotilliklar seriyasi aholini qo‘rquvga solgandi. Qotilliklar oqibatida 10 nafar qiz halok bo‘lgan, ularning eng kichigi 13 yoshli o‘smir edi. 1989-yilda qotil topilgan va umrbod qamoq jazosiga hukm qilingandi. Mazkur voqealardan 30 yil o‘tgach boshqa bir erkak — Li Chun Chje qotilliklarni amalga oshirganini tan oldi. Li qizlarni o‘ldirganini aytib, ularning qarindoshlaridan kechirim so‘ragan. Shuningdek, u o‘zining o‘rniga sudlangan va qamoq jazosini o‘tagan Yun ismli shaxsdan ham o‘z uzrini so‘ragan, deb yozmoqda RTVI.
80-yillarda Xvasonda taxminan 200 ming nafar aholi istiqomat qilgan. Qotilliklar ham juda kam sodir bo‘lgan. To‘rt yil ichida 10 nafar qizning o‘ldirilishi mahalliy huquq-tartibot idoralarini tashvishga solgan. Murdalarning hammasi bo‘g‘ib o‘ldirilgan va ularni zo‘rlash alomatlari bo‘lgan. Tergovchilar ushbu jinoyatlarni seriyali qotil amalga oshirayotganini yaxshi tushunardi.
Qidiruv-surishtiruv ishlarida 2 milliondan ziyod politsiyachi ishtirok etgan va bu Janubiy Koreya tarixidagi rekord raqamlardan biri edi. 21 mingga yaqin gumonlanuvchi so‘roq qilingan, 40 ming kishidan barmoq izlari namunalari olingan. Yakunda 1989-yili politsiya Yun ismli 22 yoshli yigitni hibsga oladi. Oradan ma’lum vaqt o‘tgach gumonlanuvchi aybiga iqrorligini tan olgan.
Yun 8-qurbon, 14 yoshli qizni zo‘rlaganini tan olgan. Jinoyatchiga umrbod qamoq jazosi berilgan. Jinoyat ishi yopilgan edi, ammo Yun qamoqxonada tergovchilarning unga zo‘ravonlik bilan ayblov e’lon qilgani va uni qilmagan ishlarini tan olishga majburlashganini aytgan. O‘z bergan ko‘rsatmalarni inkor qilgan.
Yun 20 yil davomida qamoqxonada bo‘ldi. U 2009-yilda shartli ravishda muddatidan avval ozodlikka chiqqan. 2020-yil yozida Xvason politsiya boshqarmasi boshlig‘i Pe yon Chju ilk bora 30 yil avval politsiyaning Yunga nisbatan kuch ishlatib, uni qotilliklarni tan olishga majburlaganini tan oldi. Ayni vaqtda ish qayta ko‘rib chiqilmoqda va Yunning advokatlari unga qo‘yilgan ayblovlarni bekor qilish uchun kurashmoqda.
Haqiqiy qotil Li Chun Chje bo‘lib chiqdi. U o‘z aybiga iqrorligini bildirdi. Li 2019-yilning kuzida aybiga iqrorligini aytdi, o‘shanda politsiya 57 yoshli erkakning gumonlanuvchilardan biri ekanini ma’lum qilgan. DNK tekshiruvining qayta tahlilidan keyin tergovchilar Lining 10 nafar qurbonning kamida uch nafarini o‘ldirgan bo‘lishi mumkinligini taxmin qildi. Aslida esa Li qizlarning hammasini, Yun zo‘rlagani aytilgan va aybsiz aybdor sifatida 20 yil “o‘tirib” chiqqan 8-qurbonni ham o‘ldirgan.
2020-yil 2-noyabrda bo‘lib o‘tgan Yun ishi bo‘yicha takroriy eshituvda Li qotilliklarning aybdori ekanini tan oldi. Shu tariqa uning 1986–1991-yillarda qilgan umumiy jinoyatlariga 4 ta qotillik va 30 ta zo‘rlash jinoyati kiritildi.
“Hanuzgacha o‘sha vaqtda nima uchun gumonlanuvchilar orasida bo‘lmaganimni tushunmayman. Atrofimda jinoyatlar bo‘lar, men ularni yashirishga deyarli urinmas edim. Meni juda tez va oson ushlashadi deb o‘ylardim. Axir o‘shanda shaharda minglab politsiyachilar yurardi. Ko‘pincha detektivlarga duch kelar va ular mendan atrofimda sodir bo‘lgan narsalar haqida so‘rashardi”, — degan Li.
Lini 80-yillarda sodir bo‘lgan qotilliklar uchun javobgarlikka tortib bo‘lmaydi — ularning ko‘rib chiqilish muddati o‘tib bo‘lgan. Biroq Li 1994-yildan buyon qamoqxonada qolmoqda va umrining oxirigacha ozodlikdan mahrum qilingan. 26 yil avval u o‘z rafiqasini zo‘rlash va o‘ldirishda ayblanib, umrbod qamoq jazosiga hukm qilingan.
Li sud zalida qilgan harakatlaridan pushaymonligini aytib, uzr so‘ragan.
“Men bu yerga kelib qilmishlarim tafsilotlarini aytib, qurbonlarning oila a’zolaridan kechirim so‘rayapman, ularning asl haqiqatni bilishlarini istadim. Umrimning qolgan qismini vijdon azobida o‘tkazaman”, — degan Li.
Sudda nima uchun ushbu qotilliklarni qilgani yuzasidan berilgan savolga u hanuzgacha buning aniq sababini topmaganini aytib, javob qildi.
Qotil eshituvda ishtirok etgan, nohaq ayblangan va 20 yil muddatni o‘tagan Yundan kechirim so‘ragan. Yun esa sodir bo‘lgan voqealarni idrok qilishi uchun muayyan vaqt kerak ekani, o‘z or-nomusini tiklab, hayotining qolgan qismini aybsiz odamdek o‘tkazishni istashini ta’kidlagan.
Izoh (0)