Qirg‘iziston parlamenti spikeri Kanat Isayev prezidentlik saylovlarida ishtirok etish uchun o‘z lavozimidan ketishini e’lon qildi. Unga ko‘ra, 3-noyabrda “Qirg‘iziston” partiyasi uni prezidentlik nomzodligiga ilgari surgan, deya xabar bermoqda “Kommersant”.
“Men 10-yanvar kuni bo‘lib o‘tadigan navbatdan tashqari prezident saylovlarida ishtirok etish niyatidaman. Shu munosabat bilan men parlament spikeri lavozimini tark etaman”, – dedi Isayev yig‘ilishda
U partiyaning prezidentlikka nomzodini ko‘rsatish to‘g‘risidagi qaroriga rozi ekanligini ta’kidladi.
“Mening va partiyaning manfaatlari boshi berk ko‘chaga olib kelmasligi kerak. Shuning uchun men lavozimni tark etishga qaror qildim”, – deya qo‘shimcha qildi Kanat Isayev.
Avvalroq Qirg‘iziston prezidenti vazifasini bajaruvchi Sadir Japarov prezidentlik saylovida qatnashish uchun iste’foga chiqishini ma’lum qildi.
5-oktabrda Qirg‘izistonda parlament saylovlarining natijalariga nisbatan xalqning ommaviy norozilik namoyishlari boshlangan. Namoyishchilarning kuchishlatar tizim vakillari bilan to‘qnashuvidan keyin norozilik bildirayotgan olomon prezident administratsiyasi joylashgan parlament binosini egallagan. To‘qnashuvlar oqibatida 1,2 ming nafar kishi talafot ko‘rgan va bir nafar fuqaro halok bo‘lgan. Bosh vazir Qubatbek Bo‘ronov iste’fo berdi. Qirg‘iziston prezidenti So‘ronbay Jeenbekovning matbuot kotibi uning Bishkekda ekani va hammasini nazorati ostida ushlab turganini ma’lum qildi.
9-oktabrda Bishkekda xalqning norozilik namoyishlari qayta boshlandi. Markaziy maydonda bosh vazir Sadir Japarovning tarafdorlar va muxolifat vakillari o‘rtasida to‘qnashuv kuzatildi. Oqibatda 7 nafar odam, jumladan, muxolifat yetakchisi Tilek To‘xtagaziyev jarohat oldi.
15-oktabr kuni So‘ronbay Jeenbekov Qirg‘iziston prezidentligi lavozimidan iste’fo berganini e’lon qildi. U bosh vazir Sadir Japarov va boshqa siyosatchilardan o‘z tarafdorlarini poytaxtdan olib chiqib ketishni so‘ragan va ulardan bishkekliklar tinchligini buzmaslikni iltimos qilgan. 16-oktabr kuni parlament majlisida qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.
21-oktabr kuni Jo‘qorg‘i Kenesh (Qirg‘iziston parlamenti)ga qayta saylovlar 2020-yil 20-dekabrda bo‘lib o‘tishi, tegishli qarorni mamlakat Markaziy saylov komissiyasi 21-oktabr kuni qabul qilgani haqida xabar berildi.
Izoh (0)