AQShda prezident saylovlarida ovoz berish yakunlandi, deb xabar bermoqda Meduza. Eng oxirgi bo‘lib Alyaskadagi saylov uchastkalari yopildi, bu Toshkent vaqti bilan 4-noyabr 11:00 da yuz berdi.
Saylovlarning umumiy yakuni hozircha noma’lum, ko‘pchilik shtatlarda ovozlarni hisoblash davom etmoqda. NBC telekanali hisob-kitoblariga ko‘ra, ayni paytda Bayden saylovchilar kollegiyasida 209 ta, Tramp — 212 ta ovozga ega.
Trampning Texas, Florida va Ogayoda g‘olib bo‘lgani ma’lum bo‘ldi, Bayden esa Arizonada g‘olib bo‘lishi kutilmoqda. Qolgan “ikkilanuvchi” shtatlarda ovozlar hisoblanganicha yo‘q. Pochta orqali ovoz berilgani uchun ba’zi shtatlarda, xususan, Pensilvaniyada ovozlarni hisoblash uch kungacha ham cho‘zilib ketishi mumkin.
Har ikkala nomzod ham o‘zining bo‘lajak g‘alabasiga ishonch bildirmoqda.
AQSh prezidenti saylovida g‘olib to‘g‘ridan to‘g‘ri saylovchilar tomonidan emas, balki saylovchilar kollegiyasi tomonidan aniqlanadi. Jami saylovchilar 538 kishi, g‘alaba uchun 270 kishining ovozi kerak. Saylovchilar soni har bitta shtatda aholi soniga mos ravishda taqsimlanadi — eng ko‘p aholi yashaydigan Kaliforniya shtati 55 saylovchiga ega. Ikkinchi eng yirik shtat — Texasda 38 saylovchi, Nyu-York va Floridada — 29 tadan saylovchi bor. Ikki pog‘onali tizimni hisobga olganda, nomzod umummilliy darajada kamroq ovoz to‘plasa ham, muayyan shtatlardagi g‘alabasi hisobiga saylovda g‘olib bo‘lishi mumkin.
Izoh (0)