O‘zbekiston Milliy axborot agentligi sayti (O‘zA) – “Uza.uz” yangi ko‘rinishda taqdim etildi. Agentlikning logotipi ham yangicha ko‘rinishda namoyish qilindi.
Ma’lum qilinishicha, o‘zgarishlar O‘zbekiston Respublikasi Prezidenti Shavkat Mirziyoyevning 2019-yil 2-dekabrdagi “O‘zbekiston Milliy axborot agentligi faoliyatini yana-da takomillashtirish chora-tadbirlari to‘g‘risida”gi PQ-4541-sonli qaroriga asosan amalga oshirilmoqda. Hozirda agentlikning sayti qayta ishlab chiqilgan, yangi logotip tasdiqlangan, fotobank ishga tushirilgan va mobil ilovalar tayyorlanmoqda.
Yangilangan veb-sayt
Qayd etilishicha, O‘zA veb-saytining yangilangan talqinini ishlab chiqishda foydalanuvchilar uchun qulaylik yaratishga asosiy urg‘u qaratilgan. Jumladan, sayt dizayni matnlarni oson o‘qish uchun moslashtirilgan. Foto, video va audio xabarlarni tarqatishda yangi imkoniyatlar yaratilgan. Texnologik jihatdan saytning tezkor ishlashiga ham harakat qilingan.
Hozirda sayt test rejimida ishlamoqda. Shu sababli yuzaga kelishi mumkin bo‘lgan ayrim texnik noqulayliklar uchun uzr so‘ralgan.
Yangi logotip
Ma’lum qilinishicha, O‘zA bir necha yil avval ishlab chiqilgan va bugungi zamonaviy media olami uchun ma’nan eskirgan logotipini yangilashni ma’qul deb topdi.
Yangi logotipda minimalizm uslubidan foydalanilgan, rasmiylik va soddalikning o‘zaro uyg‘unligi ta’minlangan. Ranglarni tanlashda axborot uzatishning turli shakllari (matn, video, foto, audio) hamda manbalari (sayt, mobil ilova, ijtimoiy tarmoqlar) inobatga olingan.
Fotobank
O‘zAda uzoq yillik arxivga ega bo‘lgan fotosuratlarning katta ombori bor. Shuningdek, bugungi kunda ham O‘zAning butun respublika bo‘ylab faoliyat olib borayotgan fotosuratchilari har kuni turli tadbirlar, voqea-hodisalarni o‘z obyektivlariga muhrlab boradi.
Ammo shu paytgacha mazkur fotosuratlarni bir joyga to‘playdigan, foydalanuvchilar uchun ham tomosha qilish, ham yuklab olish imkoni mavjud bo‘lgan elektron tizim yo‘q edi.
Ta’kidlanishicha, hozircha tizimga asosan yaqin kunlarda tayyorlangan fotoreportajlar yuklab borilmoqda. Kelgusida O‘zA arxividagi barcha suratlarni joylashtirish rejalashtirilgan.
Shuningdek, fotobank orqali suratlarni onlayn sotish yo‘lga qo‘yiladi. Payme, Click kabi mahalliy elektron to‘lov tizimlari hamda Visa, MasterCard kabi xalqaro kartalaridan foydalangan holda fotosuratlarning katta hajmdagi original faylini yuklab olish imkoni yaratiladi. Sotuvdan tushgan mablag‘lar fotosuratchilarga qo‘shimcha gonorar ajratish, shuningdek ularning fototexnikalarini yangilash uchun sarflanadi.
Hozirda tizim yangi ishga tushgani munosabati bilan 1 oy davomida barcha suratlarni bepul yuklab olish mumkin.
Hududiy yangiliklar
O‘zAning yangi saytida hududiy xabarlarni yoritishga alohida urg‘u qaratilgan. Shu sababli respublikadagi barcha 14 ta ma’muriy-hududiy birlik uchun alohida sahifa yaratilgan.
Shuningdek, O‘zA tez kunlarda Android hamda iOS operatsion tizimlari uchun maxsus mobil ilovalarni ham ishga tushirishni rejalashtirgan.
“Shu o‘rinda, yuqoridagi xushxabarlarni yetkazish bilan bir qatorda, bugungi kun mushtariylari uchun shakl emas, mazmun muhim ekanligini yaxshi anglashimizni ham alohida ta’kidlamoqchimiz. Qanchalik chiroyli sayt yoki yoqimli logotip bo‘lmasin, agar berilayotgan maqolalar, e’lon qilinayotgan xabar va materiallar insonlar uchun foydali va qiziqarli bo‘lmasa, bari bekor.
Shu sababli O‘zA jamoasidagi barcha xodimlar sizlarga eng sara, sifatli, tezkor va xolis axborotlar yetkazish yo‘lida bor kuch-g‘ayratini safarbar qiladi. Umid qilamizki, yangilanayotgan O‘zAda ham shakl, ham mazmun mushtariylarga manzur keladi”, – deyiladi O‘zA xabarida.
Izoh (0)