Shavkat Mirziyoyev O‘zbekistonda gidrometeorologiya xizmatini rivojlantirish masalalari bo‘yicha yig‘ilish o‘tkazgani to‘g‘risida xabar berilgandi. Yig‘ilishda ta’kidlanishicha, O‘zbekistonda aerologik kuzatuvlar 1995-yildan buyon olib borilmayapti, bu esa ob-havo to‘g‘risidagi ma’lumotlarning ishonchliligini pasaytiradi, deb yozadi Prezident matbuot xizmati.
“Biz ob-havo ma’lumotlarini aniq bilishimiz kerak. Agarda Buxorodagi stansiyalarimiz yaxshi ishlaganida, shamol bo‘lishini oldindan bilganimizda, chora-tadbirlar ko‘rilar edi. Lekin, ming afsuski, bizda aerologik kuzatuv 1995-yildan beri amalga oshirilmaydi”, — deydi Prezident.
Shavkat Mirziyoyevning so‘zlariga ko‘ra, sohaga xususiy sektor kiritilmasa, hozirgi chora-tadbirlar bilan hech narsaga erishib bo‘lmaydi.
“Biz katta qaror tayyorlayapmiz… Eng katta muammo — sohada sifat yo‘q. Bu sifatga o‘rganmaganmiz va talab bo‘lmagan. Aslida bu juda katta foyda keltiradigan soha, lekin biz bunga e’tibor bermaganmiz. Mana, qishloq xo‘jaligini isloh qilyapmiz, bu esa barcha klasterlarga kerak… Buni tijoratlashtirish bo‘yicha juda ko‘p imkoniyatlar bor”, — deydi Shavkat Mirziyoyev.
Avvalroq O‘zbekiston gidrometeorologiya xizmati samarali faoliyat yuritish uchun xodimlarning oylik maoshlari kamligi va malakali kadrlar ketib qolishi kabi masalalarni zudlik bilan hal etish lozimligini ma’lum qilgandi.
Eslatib o‘tamiz, Buxoroda 27-aprel kuni yuz bergan kuchli shamol oqibatida 41 085 ta uyga, 842 ta ijtimoiy obyektlarga shikast yetgan. 12 mingdan ortiq bug‘doy va 6400 paxta dalalari yakson bo‘lgan. Shuningdek, tabiiy ofat oqibatida bir kishi halok bo‘lgan, 41 kishi jarohatlangandi. Kuchli shamoldan so‘ng Buxoro, Navoiy, Sirdaryo va Samarqanddagi salkam 140 ming xonadon gazsiz qolgan. Buxoro kuchli shamoldan so‘ng elektr ta’minotida eng katta talafot ko‘rgandi. Aholini qo‘llab-quvvatlash va infratuzilma obyektlarini qayta tiklash uchun birinchi yarim yillikda 164 milliard so‘m yo‘naltirilgan edi.
Izoh (0)