Davlat bojxona qo‘mitasi Surxondaryo viloyati bojxona boshqarmasi Sariosiyo temiryo‘l chegara-bojxona posti xodimlari 2020-yil 3-noyabr kuni Davlat xavfsizlik xizmati hamda Chegara qo‘shinlari bilan hamkorlikda yirik miqdordagi giyohvand moddalarni respublika hududidan qonunga xilof tarzda olib o‘tishga bo‘lgan urinishni fosh etishdi, deya xabar bermoqda qo‘mita axborot xizmati “Daryo”ga.
Qayd etilishicha, qo‘shni davlatdan kirib kelgan va O‘zbekistondan tranzit tarzida o‘tayotgan yuk poyezdi inspeksion ko‘rik majmuasi orqali bojxona ko‘rigidan o‘tkazilgan. Tekshiruv davomida bojxona xodimlari vagonlardan birida shubhali skaner tasvirlarini aniqlagan.
Mazkur vagon kinologiya xodimlarining xizmat itlari yordamida chuqurlashtirilgan bojxona nazoratidan o‘tkazilganida vagonning ostki qismida maxsus xufiyona joylar tayyorlanganligi aniqlangan.
Ushbu xufiyona joylar belgilangan tartibda ochib ko‘rilganida ularning ichiga qora rangli sellofan paketlarga skotchlangan holda 23 dona 5 litrlik sig‘imga ega yelim idishlar yashirilgani fosh bo‘ldi.
Yelim idishlarning 4 tasiga oq rangli o‘tkir hidli 11 kilogramm 987 gramm og‘irlikdagi geroin, 2 kilogramm 592 gramm gashish hamda 19 dona yelim idishlarga jigarrang tusdagi o‘tkir hidli 81 kilogramm 348 gramm hajmdagi gashish moyi solingani aniqlangan.
Shundan so‘ng viloyat bojxonachilari Davlat xavfsizlik xizmati, Chegara qo‘shinlari hamda ichki ishlar xodimlari tomonidan tezkor tadbir davom ettirilib, Darband temir yo‘l stansiyasida mazkur poyezd tarkibida bo‘lgan yana bir vagon tekshiruvdan o‘tkazildi.
Natijada ushbu vagonning ostki qismida ham temir listlar yordamida tayyorlangan maxsus xufiyona joyda qora rangli sellofan paketlarga skotch bilan o‘ralgan jami 21 dona 5 litr hajmli polietilen idishlar yashirilganligi va ularning ichida 30 kilogramm 648 gramm gashish giyohvandlik vositasi hamda 45 kilogramm 906 gramm gashish moyi giyohvandlik vositasi mavjudligi aniqlangan.
O‘tkazilgan tadbirlar davomida qariyb 172,5 kilogramm og‘irlikdagi giyohvand vositalarning mamlakat hududidan yashirin ravishda o‘tkazilishiga chek qo‘yildi.
Hozirda mazkur holat yuzasidan bojxona organlari tomonidan jinoyat ishi qo‘zg‘atilib, tegishli tergov organlariga yuborilgan.
Izoh (0)