2019-yilning sentabrida ishdan bo‘shatilgan Olmazor tumani hokimining arxitektura, kapital qurilish va kommunikatsiyalarni rivojlantirish bo‘yicha o‘rinbosari vazifasini bajaruvchi sifatida yana o‘z lavozimiga tiklandi, deb xabar beradi “Gazeta.uz”.
Olmazor tumani hokimi o‘rinbosari Abdurasul Vahobov “Kun.uz” jurnalisti bilan sodir bo‘lgan mojarodan so‘ng, o‘z xohishiga ko‘ra vazifasidan ketgandi. Hokim o‘rinbosari javob videomurojaatida jurnalist Rahmatilla Isroilov muqaddam undan tamagirlik yo‘li bilan yer talab qilgani va buning evaziga katta miqdorda pora taklif qilgani haqidagi da’voni ilgari surgandi.
Rahmatilla Isroilov amaldorning so‘zlarini tuhmat deb atagan. Nashr Abdurasul Vahobovga nisbatan O‘zbekiston Bosh prokuraturasidan chora ko‘rishni so‘rab, ariza bergan. Toshkent prokuraturasi esa holat yuzasidan jinoyat ishi qo‘zg‘atishni rad etgan. Shundan so‘ng Bosh prokuratura shahar prokuraturasi qarorini bekor qilib, ishni qayta ko‘rib chiqishga yo‘naltirgan edi.
Jurnalistlar bilan uchrashuvda Toshkent prokurori o‘rinbosari Aliakbar Po‘latov hokim o‘rinbosarining so‘zlari jurnalistga nisbatan tuhmat bo‘lgan yoki bo‘lmagani to‘g‘risidagi savolga aniq javob bera olmagan. U prokuratura tekshiruvlar yakunida ishdan bo‘shatish — 20 yil hokimlikda ishlagan xodim uchun yetarlicha qattiq jazo ekanligi to‘g‘risidagi xulosaga kelinganini bildirgan.
“Xabar.uz” nashri 2-noyabr kuni Olmazor tuman hokimligining hokim o‘rinbosari vazifasini bajaruvchi Abdurasul Vahobovning imzosi qo‘yilgan xat nusxasini e’lon qildi. Xat 2020-yil 1-iyul sanasiga tegishli. Shu bilan birga, Toshkent hokimligi saytida tuman hokimning o‘rinbosari lavozimi hamon bo‘shligicha qolmoqda.
“Uzoq vaqt davomida hokim o‘rinbosari lavozimida ishlashga hech kim kelmadi… Islom sivilizatsiyasi markazining qurilishi sabab ko‘plab buzilishlar va qurilish ishlari bo‘ldi. Xalqning Prezident portaliga murojaatlari ko‘paydi. Hal etilishi lozim bo‘lgan savollar ortgani sabab Abdurasul Vahobov vaqtincha ishga qayta olindi. E’tibor bergan bo‘lsangiz, u hokim o‘rinbosari vazifasini bajaruvchi hisoblanadi. Hali hokim o‘rinbosari sifatida tayinlash bo‘yicha qaror qabul qilinmagan”, — deydi hokimlik vakili “Gazeta.uz”ga.
Olmazor hokimligi matbuot xizmatining tushuntirishicha, agarda aholining portal orqali yuborgan murojaatlariga belgilangan vaqtda javob qaytarilmasa, bu qonun buzilishi hisoblanadi va shu sababli hokimliklar javobgarlikka tortilishi mumkin.
Avvalroq Islom sivilizatsiyasi markazi qurilishi sabab Olmazor tumanidagi 237 ta xonadon buzilgani to‘g‘rsida xabar berilgandi. Qurilayotgan markaz hududida istiqomat qilgan mahalliy aholi Yashnobod tumanidagi Maxtumquli ko‘chasida joylashgan “Yashil bog‘” turar joy majmuasidagi yangi qurib foydalanishga topshirilgan ko‘p qavatli uylarga ko‘chib o‘tmoqda.
Izoh (0)