O‘zbekiston Prezidentining tegishli farmoniga muvofiq Bekmurodov Adham Sharipovich Prezidentining davlat xizmati va hokimiyat vakillik organlari bilan hamkorlik qilish masalalari bo‘yicha maslahatchisining o‘rinbosari – O‘zbekiston Prezidenti huzuridagi Davlat boshqaruvi akademiyasi rektori lavozimiga tayinlandi. Bu haqda Davlat xizmatini rivojlantirish agentligi axborot xizmati xabar qildi.
Adham Bekmurodov 1964-yil Buxoro viloyati G‘ijduvon tumanida tug‘ilgan. U 1985-yilda Toshkent xalq xo‘jaligi institutini, 1996-yilda Belgiyadagi Leuven universitetini tamomlagan.
U faoliyatini 1985-yilda Buxoro viloyati Davlat qishloq xo‘jalik texnika ta’minoti birlashmasi muhandisi sifatida boshlagan. So‘nggi yillarda u Toshkent davlat iqtisodiyot universiteti o‘quv ishlari bo‘yicha prorektori hamda Bank-moliya akademiyasi o‘quv va ma’naviyat ishlari bo‘yicha birinchi prorektori lavozimida faoliyat yuritgan.
Adham Bekmurodov 2018-yildan to shu kunga qadar “El-yurt umidi” jamg‘armasi direktori lavozimida ishlab kelayotgan edi.
Avvalroq Abduhakim Xojiboyev O‘zbekiston sog‘liqni saqlash vaziri, Alisher Shodmonov Toshkent tibbiyot akademiyasi rektori va Toshkent tibbiyot akademiyasi sobiq rektori Prezident maslahatchisining birinchi o‘rinbosari lavozimiga tayinlangani haqida xabar berilgan edi.
Izoh (0)