Ўзбекистон Миллий ахборот агентлиги сайти (ЎзА) – «Uza.uz» янги кўринишда тақдим этилди. Агентликнинг логотипи ҳам янгича кўринишда намойиш қилинди.
Маълум қилинишича, ўзгаришлар Ўзбекистон Республикаси Президенти Шавкат Мирзиёевнинг 2019 йил 2 декабрдаги «Ўзбекистон Миллий ахборот агентлиги фаолиятини яна-да такомиллаштириш чора-тадбирлари тўғрисида»ги ПҚ-4541-сонли қарорига асосан амалга оширилмоқда. Ҳозирда агентликнинг сайти қайта ишлаб чиқилган, янги логотип тасдиқланган, фотобанк ишга туширилган ва мобил иловалар тайёрланмоқда.
Янгиланган веб-сайт
Қайд этилишича, ЎзА веб-сайтининг янгиланган талқинини ишлаб чиқишда фойдаланувчилар учун қулайлик яратишга асосий урғу қаратилган. Жумладан, сайт дизайни матнларни осон ўқиш учун мослаштирилган. Фото, видео ва аудио хабарларни тарқатишда янги имкониятлар яратилган. Технологик жиҳатдан сайтнинг тезкор ишлашига ҳам ҳаракат қилинган.
Ҳозирда сайт тест режимида ишламоқда. Шу сабабли юзага келиши мумкин бўлган айрим техник ноқулайликлар учун узр сўралган.
Янги логотип
Маълум қилинишича, ЎзА бир неча йил аввал ишлаб чиқилган ва бугунги замонавий медиа олами учун маънан эскирган логотипини янгилашни маъқул деб топди.
Янги логотипда минимализм услубидан фойдаланилган, расмийлик ва соддаликнинг ўзаро уйғунлиги таъминланган. Рангларни танлашда ахборот узатишнинг турли шакллари (матн, видео, фото, аудио) ҳамда манбалари (сайт, мобил илова, ижтимоий тармоқлар) инобатга олинган.
Фотобанк
ЎзАда узоқ йиллик архивга эга бўлган фотосуратларнинг катта омбори бор. Шунингдек, бугунги кунда ҳам ЎзАнинг бутун республика бўйлаб фаолият олиб бораётган фотосуратчилари ҳар куни турли тадбирлар, воқеа-ҳодисаларни ўз объективларига муҳрлаб боради.
Аммо шу пайтгача мазкур фотосуратларни бир жойга тўплайдиган, фойдаланувчилар учун ҳам томоша қилиш, ҳам юклаб олиш имкони мавжуд бўлган электрон тизим йўқ эди.
Таъкидланишича, ҳозирча тизимга асосан яқин кунларда тайёрланган фоторепортажлар юклаб борилмоқда. Келгусида ЎзА архивидаги барча суратларни жойлаштириш режалаштирилган.
Шунингдек, фотобанк орқали суратларни онлайн сотиш йўлга қўйилади. Payme, Click каби маҳаллий электрон тўлов тизимлари ҳамда Visa, MasterCard каби халқаро карталаридан фойдаланган ҳолда фотосуратларнинг катта ҳажмдаги оригинал файлини юклаб олиш имкони яратилади. Сотувдан тушган маблағлар фотосуратчиларга қўшимча гонорар ажратиш, шунингдек уларнинг фототехникаларини янгилаш учун сарфланади.
Ҳозирда тизим янги ишга тушгани муносабати билан 1 ой давомида барча суратларни бепул юклаб олиш мумкин.
Ҳудудий янгиликлар
ЎзАнинг янги сайтида ҳудудий хабарларни ёритишга алоҳида урғу қаратилган. Шу сабабли республикадаги барча 14 та маъмурий-ҳудудий бирлик учун алоҳида саҳифа яратилган.
Шунингдек, ЎзА тез кунларда Android ҳамда iOS операцион тизимлари учун махсус мобил иловаларни ҳам ишга туширишни режалаштирган.
«Шу ўринда, юқоридаги хушхабарларни етказиш билан бир қаторда, бугунги кун муштарийлари учун шакл эмас, мазмун муҳим эканлигини яхши англашимизни ҳам алоҳида таъкидламоқчимиз. Қанчалик чиройли сайт ёки ёқимли логотип бўлмасин, агар берилаётган мақолалар, эълон қилинаётган хабар ва материаллар инсонлар учун фойдали ва қизиқарли бўлмаса, бари бекор.
Шу сабабли ЎзА жамоасидаги барча ходимлар сизларга энг сара, сифатли, тезкор ва холис ахборотлар етказиш йўлида бор куч-ғайратини сафарбар қилади. Умид қиламизки, янгиланаётган ЎзАда ҳам шакл, ҳам мазмун муштарийларга манзур келади», – дейилади ЎзА хабарида.
Изоҳ (0)