Venada to‘rt kishining o‘limi va 17 kishining jarohatlanishiga olib kelgan terakt terrorchilik tashkilotida qatnashgani uchun qamalgan Avstriya va Shimoliy Makedoniya fuqarosi bo‘lgan 20 yoshli Feyzulay Kuytim tomonidan sodir etgan. Meduza’ning xabar berishicha, bu haqda Avstriya Ichki ishlar vazirligiga tayanib, Kronen Zeitung nashri ma’lum qilgan.
2019-yilning 25-aprelida Kuytim Suriyaga ketib, IShID terrorchilariga qo‘shilmoqchi bo‘lgani uchun 22 oylik qamoq jazosiga hukm qilingan. 2019-yilning 5-dekabrida u muddatidan ilgari shartli ozod qilingan. Avvalroq Venadagi terakt IShID tarafdori bo‘lgan kamida bir nafar terrorchi tomonidan amalga oshirilgani aytilgandi.
Venadagi terakt 2-noyabr oqshomida sodir bo‘lgan. Mahalliy vaqt bilan soat 20:00 atrofida jinoyatchi yoki bir necha jinoyatchilar Venaning bir biriga yaqin joylashgan oltita joyida o‘tkinchilarga qarata o‘t ochgan.
Politsiya ma’lumotlariga ko‘ra, Feyzulay Kuytim uzun stvolli miltiq, to‘pponcha va mechete bilan qurollangan bo‘lgan. Bundan tashqari, belida portlovchi qurilma o‘rnatilgan soxta kamar ham bo‘lgan. Hujum boshlanganidan 9 daqiqa o‘tgach, mahalliy vaqt bilan soat 20:09 da 20 yoshli hujumchi Avstriya politsiyasining maxsus kuchlari tomonidan otib o‘ldirilgan. Kurier’da qayd etilishicha, jinoyatchilarning kamida bir nafari Kalashnikov avtomatidan otgan. Kronen Zeitung’ning yozishicha, u Feyzulay Kuytim bo‘lgan.
Terakt oqibatida to‘rt kishi: ikki erkak va ikki ayol halok bo‘lgan. Ma’lum bo‘lishicha, qurbonlardan biri ofitsiantka bo‘lib ishlagan. Yana 17 kishi, shu jumladan 28 yoshli politsiyachi yaralangan va ular hozir kasalxonada. Ularning aksariyati o‘qdan yaralangan, ayrimlari esa pichoqdan jarohatlangan. Jabrlanganlarning yetti nafari og‘ ir ahvolda.
Politsiya bir necha jinoyatchilar ozodlikda qolgan bo‘lishi mumkin degan fikrda. Avstriya ichki ishlar vazirligida kamida to‘rt kishi hujum qilgani aytilmoqda. Politsiya Kuytim bilan tanish bo‘lganlarda tintuv o‘tkazgan, ularning bir nechtasi hibsga olingan. Shuningdek, o‘ldirilgan terrorchining uyida ham tintuv o‘tkazilgan.
Avstriya ichki ishlar vaziri Karl Nehammerning ma’lum qilishicha, Feyzulay Kuytim hujum qilishdan avval Instagram’da ikkita qurol bilan tushgan suratini joylagan. Kuytim hujumdan avval IShIDga sodiqlikka qasamyod qilgani haqidagi ma’lumotni hozircha tasdiqlamagan. Terrorchilar faolligini kuzatib boruvchi SITE Intelligence Group guruhi rahmari Rita Katsning ma’lum qilishicha, internet tarmoqlarida terrorchi deb taxmin qilinayotgan shaxsning surati tarqalgan. Suratda IShID yetakchisi Abu Ibrohim al-Hoshimiy al-Qurayshiyga qasamyod ham keltirilgan.
Avstriya hukumati aholini uyda qolishga chaqirdi. Terakt tufayli Vena markazidagi ko‘plab do‘konlar, savdo markazlari, bank bo‘linmalari va bozorlar yopilgan. Shaharda dorixonalar ishlashda davom etmoqda, banklarda esa o‘z o‘ziga xizmat qilish zonalari ochiq.
Hujumdan so‘ng Avstriya hukumati uch kunlik motam e’lon qildi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Mavzuga doir: Venadagi terakt. Asosiy ma’lumotlar
Izoh (0)