Венада тўрт кишининг ўлими ва 17 кишининг жароҳатланишига олиб келган теракт террорчилик ташкилотида қатнашгани учун қамалган Австрия ва Шимолий Македония фуқароси бўлган 20 ёшли Фейзулай Куйтим томонидан содир этган. Meduza’нинг хабар беришича, бу ҳақда Австрия Ички ишлар вазирлигига таяниб, Kronen Zeitung нашри маълум қилган.
2019 йилнинг 25 апрелида Куйтим Сурияга кетиб, ИШИД террорчиларига қўшилмоқчи бўлгани учун 22 ойлик қамоқ жазосига ҳукм қилинган. 2019 йилнинг 5 декабрида у муддатидан илгари шартли озод қилинган. Аввалроқ Венадаги теракт ИШИД тарафдори бўлган камида бир нафар террорчи томонидан амалга оширилгани айтилганди.
Венадаги теракт 2 ноябрь оқшомида содир бўлган. Маҳаллий вақт билан соат 20:00 атрофида жиноятчи ёки бир неча жиноятчилар Венанинг бир бирига яқин жойлашган олтита жойида ўткинчиларга қарата ўт очган.
Полиция маълумотларига кўра, Фейзулай Куйтим узун стволли милтиқ, тўппонча ва мечете билан қуролланган бўлган. Бундан ташқари, белида портловчи қурилма ўрнатилган сохта камар ҳам бўлган. Ҳужум бошланганидан 9 дақиқа ўтгач, маҳаллий вақт билан соат 20:09 да 20 ёшли ҳужумчи Австрия полициясининг махсус кучлари томонидан отиб ўлдирилган. Kurier’да қайд этилишича, жиноятчиларнинг камида бир нафари Калашников автоматидан отган. Kronen Zeitung’нинг ёзишича, у Фейзулай Куйтим бўлган.
Теракт оқибатида тўрт киши: икки эркак ва икки аёл ҳалок бўлган. Маълум бўлишича, қурбонлардан бири официантка бўлиб ишлаган. Яна 17 киши, шу жумладан 28 ёшли полициячи яраланган ва улар ҳозир касалхонада. Уларнинг аксарияти ўқдан яраланган, айримлари эса пичоқдан жароҳатланган. Жабрланганларнинг етти нафари оғ ир аҳволда.
Полиция бир неча жиноятчилар озодликда қолган бўлиши мумкин деган фикрда. Австрия ички ишлар вазирлигида камида тўрт киши ҳужум қилгани айтилмоқда. Полиция Куйтим билан таниш бўлганларда тинтув ўтказган, уларнинг бир нечтаси ҳибсга олинган. Шунингдек, ўлдирилган террорчининг уйида ҳам тинтув ўтказилган.
Австрия ички ишлар вазири Карл Неҳаммернинг маълум қилишича, Фейзулай Куйтим ҳужум қилишдан аввал Instagram’да иккита қурол билан тушган суратини жойлаган. Куйтим ҳужумдан аввал ИШИДга содиқликка қасамёд қилгани ҳақидаги маълумотни ҳозирча тасдиқламаган. Террорчилар фаоллигини кузатиб борувчи SITE Intelligence Group гуруҳи раҳмари Рита Кацнинг маълум қилишича, интернет тармоқларида террорчи деб тахмин қилинаётган шахснинг сурати тарқалган. Суратда ИШИД етакчиси Абу Иброҳим ал-Ҳошимий ал-Қурайшийга қасамёд ҳам келтирилган.
Австрия ҳукумати аҳолини уйда қолишга чақирди. Теракт туфайли Вена марказидаги кўплаб дўконлар, савдо марказлари, банк бўлинмалари ва бозорлар ёпилган. Шаҳарда дорихоналар ишлашда давом этмоқда, банкларда эса ўз ўзига хизмат қилиш зоналари очиқ.
Ҳужумдан сўнг Австрия ҳукумати уч кунлик мотам эълон қилди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Мавзуга доир: Венадаги теракт. Асосий маълумотлар
Изоҳ (0)