Qashqadaryo viloyatida yana ikkita tuman paxta topshirish rejasini ortig‘i bilan bajarib, davlat oldidagi majburiyatini bajardi, deya xabar berdi “Daryo” muxbiri.
Xabar berilishicha, Kasbi tumanidan so‘ng g‘uzorlik paxtakorlar viloyatda ikkinchi bo‘lib, joriy yilgi paxta topshirish shartnomaviy rejasini bajargan. Tuman paxtakorlari 15 ming 700 tonnadan ortiq paxta xirmoni bunyod etgan.
“Xalqimizda ‘Yerni boqsang, yer ham seni boqadi’, degan maqol bejiz aytilmagan. Sohada katta natijaga erishish uchun birinchi navbatda rizq-ro‘zimiz manbayi bo‘lgan yerni boqishimiz, tuproq unumdorligini oshirishimiz zarur. Tuman hokimi boshchiligida biz ana shu muhim tadbirlarga alohida e’tibor qaratdik. Shuningdek, yerlarning meliorativ holatini yaxshilash borasidagi ishlar ham o‘zining samarasini bera boshladi”, — deydi tuman hokimining qishloq va suv masalalari bo‘yicha o‘rinbosari Zavqiddin Bo‘riyev.
G‘uzor tuman hokimligi axborot xizmatining aniqlik kiritishicha, tumanda paxta yig‘im-terimini tizimli tashkil etish bo‘yicha 96 ta terim otryadi shakllantirilib, ularga 11 ming nafardan ortiq terimchilar ixtiyoriy ravishda biriktirilgan.
Viloyatda uchinchi bo‘lib paxta topshirish rejasini bajargan tuman Muborak tumani bo‘lib, hudud paxtakorlari davlatga 25 ming tonna oq oltin topshirib, shartnomaviy rejani 100,3 foizga bajargan. Viloyatning bu boradagi ko‘rsatkichi esa 88 foizga yetgan.
Aytilishicha, tumandagi paxta yig‘im-terimida 9 mingdan ortiq terimchi ishtirok etgan.
Eslatib o‘tamiz, avvalroq viloyatning Koson tumanida yashovchi oila 38 kun paxta terib, 41 million so‘m daromad qilgani, viloyat rahbari Zoir Mirzayev esa terimchi oilaga maxsus sovg‘a va’da qilgani haqida xabar berilgandi.
Izoh (0)