Қашқадарёда мактабда ўқиб юрган пайтида туғилганлик ҳақидаги гувоҳномасини йўқотган Маҳлиё Бозорова 24 ёшга кирганида ҳужжатини қайта тиклашга эришди. Бу ҳақда Ёшлар ишлари агентлигининг вилоят бошқармаси маълум қилди.
Таъкидланишича, Ёшлар ишлари агентлигининг вилоят бошқармаси ҳамда ҳамкор ташкилотлар «Ёшлар дафтари» хатловини юритиб, вилоятдаги 18-30 ёшли ёрдамга муҳтож аёллар рўйхатини шакллантирмоқда.
«Ғузор туманига бириктирилган Шаҳрисабз тумани ишчи гуруҳи ‘Дўлтали’ МФЙда мураккаб вазиятга дуч келди. Сўровнома жараёнида 24 ёшли фуқаро Бозорова Маҳлиё Файзи қизининг фуқаролигини тасдиқловчи паспорти ва гувоҳномаси йўқлиги аниқланди. Маҳлиёнинг айтишича, у мактабда ўқиб юрганида туғилганлиги ҳақидаги гувоҳномасини йўқотиб қўйган. Аксига олиб, мактаб маъмурияти ҳам ҳужжатингни йўқотиб қўйдик дея, шаҳодатнома бермаган», — дейилади бошқарма ахборот хизмати берган маълумотда.
Айтилишича, Ғузор тумани ҳокими Бекзод Суюнов ташаббуси билан масъул ташкилотлар ҳамкорлигида тегишли ҳужжатлар тўпланган ва 24 ёшли қизга гувоҳнома ва фуқаролик паспорти расмийлаштирилган.
Қўшимча қилинишича, масъуллар Маҳлиё Бозоровага мактабни тугатганлигини тасдиқловчи шаҳодатномани ҳам олиб беришни мақсад қилган.
Изоҳ (0)