IIV huzuridagi Tergov departamenti Qashqadaryoda 170 ming so‘m qarz uchun kelib chiqqan janjal 24 yoshli yigitning o‘limiga sabab bo‘lganini xabar qildi.
Qashqadaryo viloyatida 2020-yilning 27-oktabr kuni soat 22:00 da fuqaro 21 yoshli Z.I., Shahrisabz tumani O‘rtaqo‘rg‘on qishlog‘ida yashovchi qarindoshi 24 yoshli J.E.ning yashash uyiga borib, 170 ming so‘m qarzini so‘rab, u bilan o‘zaro janjallashgan. Z.I. xonadon egasiga oshxona pichog‘i bilan turli ko‘rinishdagi tan jarohatlari yetkazgan.
J.E. tibbiy yordam ko‘rsatish uchun ota-onasi tomonidan Shahrisabz shahar tibbiyot birlashmasiga olib borilgan. Ammo olgan tan jarohatlari oqibatida tashqi qon ketishi, o‘tkir yurak-qon tomir va nafas yetishmovchiligidan shifoxonada vafot etgan.
Hodisa sodir bo‘lgan joy ko‘zdan kechirish jarayonida bir dona yog‘och dastali, tig‘ining uzunligi 14 santimetr bo‘lgan oshxona pichog‘i va qonga o‘xshash dog‘lar ashyoviy dalil tariqasida rasmiylashtirib olingan.
Mazkur holat yuzasidan tuman IIB huzuridagi Tergov bo‘limi tomonidan Z.I.ga nisbatan O‘zbekiston Respublikasi Jinoyat kodeksining 104-moddasi 3-qismi “D” bandi (qasddan badanga og‘ir shikast yetkazish) bilan jinoyat ishi qo‘zg‘atilgan. Z.I. protsessual tartibda ushlangan. Jinoyat ishi bo‘yicha tergov harakatlari olib borilmoqda.
Izoh (0)