AQSh prezidenti Donald Tramp amerikalik shifokorlarni ko‘proq pul ishlash uchun koronavirus statistikasini atayin oshirib yozganlikda aybladi. “Kommersant”ning CNN’ga tayanib xabar berishicha, bu haqda u 31-oktabr kuni Michigan shtatidagi saylovoldi yig‘ilishida aytgan.
“Bizning shifokorlarimiz juda aqlli odamlar. Xo‘sh, ular nima qilishyapti. Ular, kechirasiz, hamma COVID’dan vafot etyapti, deyapti... bu esa qo‘shimcha 2 ming dollar degani, shuning uchun ularda pul ko‘p”, — degan Tramp.
Xabarda aytilishicha, 30-oktabr kuni AQShda sutkalik kasallanishlar soni bo‘yicha butun pandemiya davri davomidagi eng yuqori ko‘rsatkich qayd etildi. Mamlakatning 17 ta shtatida esa kasalxonaga yotqizilganlar soni rekord darajaga yetdi. Bu uch kun ichida uchinchi sutkalik antirekord bo‘ldi.
Eslatib o‘tamiz, AQShda 30-oktabr kuni yana 100 mingdan ortiq odamda koronavirus aniqlandi. 3-oktabr kuni Donald Tramp koronavirusga qarshi Amerika vaksinasi tez orada paydo bo‘lishini e’lon qilgandi. 25-oktabr kuni esa COVID-19’ga qarshi vaksina pandemiyaga nuqta qo‘yishini bildirdi.
AQSh sobiq prezidenti Barak Obama esa Trampning amerikaliklarni koronavirusdan himoya qila olishiga shubha qilmoqda.
Izoh (0)