Rossiya prezidenti Vladimir Putin Davlat dumasiga Federatsiya Kengashini shakllantirish tartibi to‘g‘risidagi qonun loyihasini taqdim etdi. Hujjat Rossiya Konstitutsiyasiga yangi tuzatishlar kiritishni ko‘zda tutadi, deya xabar bermoqda Meduza.
Qonun loyihasida prezidentlik lavozimini muddatidan oldin yoki vakolat muddati tugashi munosabati bilan tark etgan Rossiyaning sobiq prezidentlariga senator lavozimini umrbod egallashga ruxsat berish taklif etiladi.
Vakolatini tugatgan prezident davlat rahbari lavozimidan ketganidan keyin uch oy ichida senator bo‘lish uchun bir marta murojaat qilishi mumkin. Muddati ushbu qonun qabul qilinganidan oldin tugagan sobiq prezident qonun kuchga kirgan kundan boshlab uch oy ichida murojaat qilishi mumkin.
Shu bilan birga, Davlat dumasiga senator va Davlat dumasi deputati maqomi to‘g‘risidagi yana bir prezidentlik qonun loyihasi taqdim etildi. Hujjatda, boshqa narsalar qatori, umrbod senatorga aylangan prezident qonunda belgilangan ijtimoiy va boshqa kafolatlar, masalan, daxlsizlik huquqi va umrbod oylik olish huquqiga ega ekanligi belgilangan.
Avvalroq Rossiya Konstitutsiyasiga tuzatishlar kiritilgan edi. Unga ko‘ra, Putinning prezidentlik muddatlari nollashtirilib, unga navbatdagi saylovlarda ham o‘z nomzodini qo‘yishga imkon beruvchi band kiritilgan.
Konstitutsiyaga tuzatishlar kiritish bo‘yicha umumxalq referendumi 1-iyul kuni o‘tkazildi. Markaziy saylov komissiyasi ma’lumotlariga ko‘ra, saylovda ishtirok etganlarning 77,92 foizi tuzatishlarga rozilik bildirgan, 21,27 foizi qarshi chiqqan. Ovoz berishda davomat 67,97 foizni tashkil qilgan. Konstitutsiyaga tuzatishlar kiritish to‘g‘risidagi farmonni Putin 3-iyul kuni imzolagan.
Izoh (0)