Rossiyalik ekspert koronavirus ustidan faqat vaksina nazorat o‘rnatishi mumkinligini ma’lum qildi

Rossiyaning “Vektor” virusologiya va biotexnologiya davlat ilmiy markazi bosh direktori o‘rinbosari Aleksandr Agafonovning fikricha, koronavirus infeksiyasi ustidan nazoratni vaksina yordamida o‘rnatish kerak bo‘ladi. Bu haqda “Interfaks” xabar berdi.

“Kasallik ustidan nazoratni vaksina yordamida o‘rnatishga to‘g‘ri kelishiga tayyorlanish kerak bo‘ladi. Biror infeksiya ustidan nazorat vaksina yordamisiz o‘rnatilmagan”, — deya ma'lum qilgan Agafonov Novosibirskda 30-oktabr kuni bo‘lib o‘tgan OpenBio-2020 forumida.

“Biz vaksina ishlab chiqaramiz, bu muammoni yopamiz, dori vositalari nazorat o‘rnatish uchun har doim muhim hisoblanadi, bu yerda ham istiqbollar bor”, — deya ta’kidlagan ekspert.

Agafonovning qayd etishicha, koronavirus pandemiyasiga qadar qandaydir nazariy “X kasalligi”ning tarqalishiga tayyorgarlik bosqichi sifatida Ebola virusi, atipik pnevmoniya, Yaqin Sharqda respirator sindromi, 2009-yildagi gripp qaralgan.

“Balki SARS Cov-2 hali X kasalligi bo‘lmasligi mumkin, u Ebola virusi xususiyatlariga ega bo‘lmagani uchun omadimiz keldi, shunday bo‘lish ehtimoli ham yo‘q emas”, — degan markaz vakili.

Eslatib o‘tamiz, Rossiyaning “Vektor” virusologiya va biotexnologiya davlat ilmiy markazi mamlakatdagi koronavirusga qarshi ikkinchi vaksinani ishlab chiqarishni boshladi. “EpiVakKorona” Rossiyaning koronavirusga qarshi ikkinchi vaksinasi bo‘lib, ushbu vaksina uchun sentabr oyi oxirlarida patent olingan. Vaksina mushak ostiga jo‘natiladigan suspenziya shaklida ishlab chiqariladi.

Avvalroq Rossiyada patentlangan va ro‘yxatga olingan COVID-19’ga qarshi birinchi vaksina yaratilgan Gamaleya ilmiy markazi direktori Aleksandr Ginsburg koronavirusga qarshi vaksina qabul qilinganidan keyin paydo bo‘ladigan antitanalar keksa, spirtli ichimlik ichuvchi, ruhiy bosimga tushgan va yallig‘lanishga qarshi dori qabul qiladigan kishilarda yaxshi shakllanmasligini ma’lum qilgandi.

Shuningdek, Britaniyalik ekspertlar koronavirusga qarshi dastlabki vaksinalarga ishonchsizlik bildirgandi. Bill Geyts koronavirusga qarshi dastlabki vaksinalar samaradorligi ideal bo‘lmasligi mumkinligini aytgandi.