Rossiyada bir sutkada 18 665 kishida COVID-19 aniqlandi. Bu mamlakatda kunlik kasallanishlar soni bo‘yicha yangi antirekord

Rossiyada so‘nggi bir sutka ichida 18 665 kishida koronavirus bilan kasallanish holati qayd etildi, deb xabar bermoqda Meduza.

Bir kun avval 18 140 kishida, 30-oktabr kuni esa 18 283 kishida COVID-19 aniqlangandi.

Sutka davomida COVID-19 bemorlarining 245 nafari, epidemiya boshlanganidan buyon esa jami 28 235 nafari vafot etgan.

Eng ko‘p kasallanish holatlari Moskvada qayd etilgan (sutka davomida 5261, umumiy hisobda 429 409 nafar).

Rossiyada ushbu kasallik qayd etilganlarning umumiy soni 1 636 781 nafarga yetdi. Ushbu ko‘rsatkich bo‘yicha Rossiya dunyoda to‘rtinchi o‘rinda bormoqda.

Mamlakatda koronavirusni aniqlash bo‘yicha so‘nggi 24 soat davomida 587 mingta, umumiy hisobda esa 61 millionta test o‘tkazilgan.

“Rospotrebnadzor” epidemiologi Aleksandr Gorelovning fikricha, Rossiyada kasallanganlar sonining ortishi yana 2-3 hafta davom etadi. Gamaleya nomidagi Milliy epidemiologiya va mikrobiologiya ilmiy-tadqiqot markazi virusologi Viktor Zuyev esa mamlakatda epidemiologik vaziyat 2021-yil yozida barqarorlashadi, degan fikrda.

“Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.