Toshkent shahar IIBB boshlig‘ining o‘rinbosari polkovnik Murodilla Aliqoriyev 2020-yilning 29 va 30-oktabr kunlari Yo‘l harakati xavfsizligi boshqarmasi va Huquqbuzarliklar profilaktikasi boshqarmasidagi mas’ul shaxslar bilan birgalikda poytaxtdagi avtomashina yuvish va shu kabi xizmatlar ko‘rsatish bilan shug‘ullanuvchi 217 ta tashkilot vakillari bilan uchrashdi. Bu haqda boshqarma axborot xizmati xabar bergan.
“Tadbirning maqsadi – Toshkent shahridagi avtomashina yuvish shoxobchalari hududida uchrab turadigan, xususan, transport vositalarini o‘z maqsadida ishlatish, olib qochish kabi jinoyatlarning oldini olishdan iborat”, – deyilgan boshqarma xabarida.
Uchrashuvlarda tashkilot rahbarlari ular ishga olayotgan shaxslar uchun mas’ul ekani haqida ogohlantirilgan. Ishchilarning mas’uliyatini oshirish, ma’lumotlarini qayd etish ham rahbarning vazifasi ekanligi qayd etilgan, shu bilan birga, ishchilarni mijozning avtomobili kalitini olishiga yo‘l qo‘ymasdan, buning o‘rniga barcha mijozlardan kalitlarni oluvchi bitta mas’ul shaxsni tayinlash tavsiya etilgan.
“Avtomashina yuvish shoxobchalari rahbarlari ishga qabul qilinayotgan shaxslarning ma’lumotlarini tekshirish qiyinligi, bunda hududiy ichki ishlar organlarining yordami kerakligini aytishdi. Mazkur iltimos qondirildi, endi avtomobil yuvish shoxobchasi rahbari profilaktika inspektorlari bilan birgalikda ishga olinayotgan shaxslarning ma’lumotlari haqqoniyligini tekshirishi mumkin. Shu bilan birga, ishga olinayotgan shaxs qidiruvda emasligini, xususan, ilgari avtomobil olib qochmaganligini tekshirish mumkin.
Hurmatli transport vositalari haydovchilari! Sizdan mazkur muammoga jiddiy yondashishni va mashinangizning kalitini avtomobil yuvish shoxobchasining oddiy ishchilariga bermaslikni so‘raymiz. Unutmang, siz yo‘qligingizda avtomobilingiz turli maqsadlarda ishlatilishi mumkin. Muammo chiqishidan oldin to‘g‘ri yo‘l tutib, o‘z vaqtingiz va asabingizni asrang!”, – deyiladi Toshkent shahar IIBB axborot xizmatining xabarida.
Izoh (0)