Тошкент шаҳар ИИББ бошлиғининг ўринбосари полковник Муродилла Алиқориев 2020 йилнинг 29 ва 30 октябрь кунлари Йўл ҳаракати хавфсизлиги бошқармаси ва Ҳуқуқбузарликлар профилактикаси бошқармасидаги масъул шахслар билан биргаликда пойтахтдаги автомашина ювиш ва шу каби хизматлар кўрсатиш билан шуғулланувчи 217 та ташкилот вакиллари билан учрашди. Бу ҳақда бошқарма ахборот хизмати хабар берган.
«Тадбирнинг мақсади – Тошкент шаҳридаги автомашина ювиш шохобчалари ҳудудида учраб турадиган, хусусан, транспорт воситаларини ўз мақсадида ишлатиш, олиб қочиш каби жиноятларнинг олдини олишдан иборат», – дейилган бошқарма хабарида.
Учрашувларда ташкилот раҳбарлари улар ишга олаётган шахслар учун масъул экани ҳақида огоҳлантирилган. Ишчиларнинг масъулиятини ошириш, маълумотларини қайд этиш ҳам раҳбарнинг вазифаси эканлиги қайд этилган, шу билан бирга, ишчиларни мижознинг автомобили калитини олишига йўл қўймасдан, бунинг ўрнига барча мижозлардан калитларни олувчи битта масъул шахсни тайинлаш тавсия этилган.
«Автомашина ювиш шохобчалари раҳбарлари ишга қабул қилинаётган шахсларнинг маълумотларини текшириш қийинлиги, бунда ҳудудий ички ишлар органларининг ёрдами кераклигини айтишди. Мазкур илтимос қондирилди, энди автомобиль ювиш шохобчаси раҳбари профилактика инспекторлари билан биргаликда ишга олинаётган шахсларнинг маълумотлари ҳаққонийлигини текшириши мумкин. Шу билан бирга, ишга олинаётган шахс қидирувда эмаслигини, хусусан, илгари автомобиль олиб қочмаганлигини текшириш мумкин.
Ҳурматли транспорт воситалари ҳайдовчилари! Сиздан мазкур муаммога жиддий ёндашишни ва машинангизнинг калитини автомобиль ювиш шохобчасининг оддий ишчиларига бермасликни сўраймиз. Унутманг, сиз йўқлигингизда автомобилингиз турли мақсадларда ишлатилиши мумкин. Муаммо чиқишидан олдин тўғри йўл тутиб, ўз вақтингиз ва асабингизни асранг!», – дейилади Тошкент шаҳар ИИББ ахборот хизматининг хабарида.
Изоҳ (0)