Avstraliya politsiyasi Kerol Richards ismli fuqaroga 1973-yilda ishlab chiqarilgan pushtirang Holden Torana’ni qaytarib berdi. Bundan 28 yil oldin o‘g‘irlab ketilgan avtomobil ajib modelni sotib olgan kolleksioner yordamida topishga muvaffaq bo‘lingan, deb xabar beradi Motor.
Kerol Richards Holden Torana’ni 1973-yilda sotib olgan. Ayol kupedan har kuni foydalangan, shuningdek, u havaskorlar poygasida ham ishtirok etgan. 1992-yilda pushtirang Torana ayolning uyi qarshisidan o‘g‘irlab ketilgan. Shundan buyon avtomobil haqida biror ma’lumot bo‘lmagan.
Politsiya ilk ashyoviy dalillarni 2016-yilga kelibgina topa boshlagan. Mahalliy idora xodimlari avtomobil o‘g‘irlash bilan shug‘ullangan jinoiy guruhni ushlashga muvaffaq bo‘lgan. Ular o‘g‘irlangan barcha modellarning raqamlarini o‘zgartirib, soxta hujjatlar bilan sotgan. Holden Torana ham shu kabi firibgarlik “qurboni bo‘lgan”.
Oradan uzoq yillar o‘tgach, pushtirang kupeni avstraliyalik kolleksioner xarid qilgan. Shundan so‘ng, erkak hujjatlardagi xatolikni payqab qolib, zudlik bilan politsiyaga murojaat qilgan. Huquq-tartibot xodimlari 50 yoshli gumonlanuvchini qo‘lga olgan. U ikki yillik qamoq jazosi hukm etilgan va 390 ming dollar miqdorida jarimaga tortilgan.
Pushtirang Holden Torana esa oradan 28 yil o‘tib, hozirda 74 yoshni qarshilagan egasiga qaytarilgan. Oradan shuncha vaqt o‘tganiga qaramay, kupe 90 ming dollarga baholangan. Kerol Richard mashinasini hech qachon sotmasligini ma’lum qilgan.
Avvalroq AQShda 32 yil oldin o‘g‘irlab ketilgan Chevrolet Camaro ko‘l ostidan topilgani to‘g‘risida xabar berilgandi.
Izoh (0)