АҚШда COVID-19 коронавирус инфекцияси билан касалланиш бўйича суткалик антирекордлар янгиланишда давом этмоқда – 29 октябрь ҳолатига кўра бир сутка ичида 90 456 та янги ҳолат қайд этилди. Бу ҳақда NBC News хабар берган.
Телеканал хабарига кўра, бу 28 октябрда қайд этилган кўрсаткичдан 10 мингта ҳолатга кўп.
Шу тариқа COVID-19 пандемияси бошланганидан буён АҚШда бир кун давомида касаллик қайд этилганлар сони илк бора 90 минг нафардан ошган.
Бундан ташқари, бир суткада 982 нафар бемор инфекция асоратлари оқибатида ҳаётдан кўз юмган.
CNN телеканали COVID-19 коронавируси бўйича Оқ уй ишчи гуруҳининг мамлакат ғарбий қисмида инфекциянинг тўхталишсиз, кенг миқёсда тарқалиб бораётгани ва пандемияга қарши кураш бўйича чораларни кучайтириш лозимлигини билдиргани ҳақида хабар берган.
«Биз АҚШ ўрта ғарби, юқори ўрта ғарби ва ғарбида коронавирус инфекциясининг тўхтовсиз кенг миқёсда тарқалишини кузатмоқдамиз. Бу касалликнинг белгисиз ва белгили шаклларига қарши тезкор ва самарали чоралар кўришни талаб этади», – дейилади ишчи гуруҳ баёнотида.
Гуруҳ ҳудуд штатларини эпидемиологик хавфсизлик талабларига риоя этиш, ижтимоий масофаланишга амал қилиш, шунингдек, жамоат жойларида оломоннинг тўпланишига йўл қўймаслик лозимлигини қайд этган.
Worldometer сайтининг маълумоти бўйича 30 октябрь Тошкент вақти билан 19:00 ҳолатига кўра, АҚШда 9 миллион нафардан кўпроқ аҳолида коронавирус инфекцияси аниқланган, 234 мингдан зиёд бемор инфекция асоратлари оқибатида ҳаётдан кўз юмган.
Аввал АҚШда ўтган бир ҳафта ичида коронавирус билан касалланиш бўйича рекорд кўрсаткич қайд этилгани ҳақида хабар берилганди.
Изоҳ (0)