Samarqandda monolit usulda ilk avtomobil yo‘l o‘tkazgichi qurilmoqda

Samarqand shahridan o‘tgan M-39 avtomobil yo‘lining 1083-kilometrida yangi yo‘l o‘tkazgich “O‘zbekiston temir yo‘llari” AJning “Ko‘prikqurilishloyiha” korxonasi hamda Rossiyaning yetakchi mutaxassislari bilan hamkorlikda tayyorlangan loyiha asosida barpo qilinmoqda. Bu haqda aksiyadorlik jamiyatining matbuot xizmati xabar berdi.

Loyihaga ko‘ra, yo‘l o‘tkazgichning balandligi 5,5, uzunligi 110, kengligi esa 28,9 metrni tashkil etib, inshootdan ikki tomonga yo‘nalish bo‘ylab ikkita syezd mavjud. Ushbu yo‘l o‘tkazgich foydalanishga topshirilgach, bir soatda qariyb 600 ga yaqin, bir sutkada esa 14 mingta avtomobilni o‘tkazish imkoniyati yaratiladi. Amalga oshirilayotgan loyihaning oraliq qurilmasi kesimsiz uch oraliqli balka bo‘lib, qurilish balandligi bo‘yicha o‘zgaruvchan bo‘ladi. Ikki chetidagi oraliq qurilmaning uzunligi 33 metr, o‘rtadagi oraliq qurilmaning uzunligi esa 42 metrdan iborat bo‘ladi. Mazkur yo‘l o‘tkazgichga jami 6000 metr kub beton yotqizish ishlari mo‘ljallangan bo‘lib, hozirgi kunga qadar 3000 metr kub beton yotqizildi.

“Deformatsion choklar rezina-metalli qoplama turidan iborat bo‘lib, o‘tkazgichning eni va uzunligi bo‘ylab harakatlanishiga imkoniyat beradi va avtomobillarning tekis va ravon harakatlanishiga zamin yaratadi. Mutaxassislarning aytishicha, bunday deformatsion choklar birinchi marotaba ishlatilmoqda”, — deyiladi xabarda.

Monolit oraliq qurilma ham yaxlit havozalarda 2 bosqichda quriladi. Dastlab bir yo‘nalishda uchta harakat yo‘li, ikkinchi yo‘nalishda xuddi shuncha harakat yo‘li quriladi. Ushbu yo‘l o‘tkazgich qurilishini “Ko‘prikqurilish tresti” korxonasining 200 nafar mutaxassisi zamonaviy texnika va uskunalardan foydalangan holda amalga oshirmoqda.

Ma’lumot uchun, mazkur korxona mutaxassislari so‘nggi 5—10 yil davomida faqat poytaxtning o‘zida ko‘plab yirik loyihalar amalga oshirilgan. Xususan, G‘ofur G‘ulom va Abdulla Qodiriy ko‘chalari kesishmasidagi yirik transport yechimi, Muqimiy va Shota Rustaveli ko‘chalari kesishmasidagi yoysimon shaklidagi yo‘l o‘tkazgich, “Novza” va “Mirzo Ulug‘bek” metro bekatlari yaqinidagi ko‘priklar, Oqtepa maydonida yo‘l-transport yechimi, Taraqqiyot ko‘chasini kesib o‘tuvchi avtomobil va temiryo‘l ko‘priklari, Ohangaron shossesi va Maxtumquli ko‘chasi kesishmasidagi yangi uch pog‘onali yo‘l o‘tkazgichi shular sirasiga kiradi.