“6,5 mlrd so‘mga qurilgan ko‘prik quladi. Endi yo‘limiz ham shunday yaroqsiz bo‘lmasin” — qumqo‘rg‘onliklar

Surxondaryo viloyatining Qumqo‘rg‘on tumanidagi “Ko‘ganli” mahallasida yashovchi aholi hududda 6,5 milliard so‘mga qurib bitkazilgan ko‘prik hech qancha vaqt xizmat ko‘rsatmay qulab tushganini, yangi qurilayotgan yo‘l ham xuddi shunday sifatsiz bajarilib yaroqsiz holga kelib qolishidan qo‘rqmoqda.

Bu haqda “Daryo”ga shikoyat qilgan qumqo‘rg‘onliklar yo‘l ta’miri uchun ajratilgan 5,5 milliard so‘m to‘g‘ri sarflanmayapti degan fikrda.

“Daryo” muxbiri Otabek Qo‘ldoshev mazkur murojaatni o‘rganish maqsadida Surxondaryo viloyatining Qumqo‘rg‘on tumanida bo‘ldi.

“Mahallamiz hududidan o‘tuvchi 19 km yo‘l ta’miri uchun 5,5 milliard so‘m mablag‘ ajratilib, 2020-yilning yanvar oyida ta’mirlash ishlari boshlab yuborilgan. Biroq ta’mirlash ishlari loyihada ko‘rsatilgandek amalga oshirilmayapti. Bu esa yo‘lning sifatsiz qurilishiga sabab bo‘ladi”, — deydi tumanning “Ko‘ganli” mahallasida yashovchi Umbar Zoirov.

Umbar Zoirovning ma’lumot berishicha, Sariosiyodan olib kelinishi lozim bo‘lgan sheben, Jarqo‘rg‘ondan kelishi lozim bo‘lgan qum va neft mahsulotlari olib kelinmayapti. Ularning o‘rniga loyli qum va sifatsiz shebendan foydalanilmoqda.

“Loyihada sheben Sariosiyodan, qum va neft mahsulotlari esa Jarqo‘rg‘ondan olib kelinishi ko‘rsatilib mablag‘ ham shunga yarasha ajratilgan. Lekin yo‘l ta’miriga mas’ullar loyihada aytilgan ishni bajarmayapti. Daryodan loyli qum olib kelib, ishning sifatsiz bajarilishiga sababchi bo‘lmoqda”, — deydi mahalla faoli.

Murojaatchilar mahallada 2017-yil oxirida 6,5 milliard so‘mga qurilib, foydalanishga topshirilgan ko‘prik 2020-yil boshiga kelib yaroqsiz holga kelganini aytib, yo‘l ham shunday sifatsiz bajarilgach, hech qancha vaqt o‘tmay yaroqsiz bo‘lib qolishi mumkinligini taxmin qilmoqda.

“Daryo” muxbiri bilan suhbatlashgan aholining aytishicha, yo‘l ta’miri sifatsiz bajarilayotgani sabab aholi yo‘l ta’mirini to‘xtatishni talab qilgan.

“Yo‘l sifatsiz ta’mirlanayotgani, shuningdek, qurilish-ta’mirlash ishlari bajarilayotgan payt yo‘l belgilari o‘rnatilmagani sabab biz bundan norozi bo‘ldik va ta’mirlash ishlari to‘xtatilishini talab qildik, — deydi aholi vakillari. — Ushbu hududda 500 nafar o‘quvchi o‘qiydigan 43-maktab bor. 2020-yil yanvarda ta’mirlash ishlari boshlangan payt loyli qum to‘kilgani sabab farzandlarimiz maktabga borishda loyga botib qolardi. Ayni kunlarda esa chang to‘zondan aziyat chekyapmiz”.

Aholining qo‘shimcha qilishicha, talabga javob bermaydigan yo‘l sabab yo‘lkira narxlari ham keskin oshgan.

“Taksilar mahallamizga kirish joydagi katta yo‘ldan Denovga qadar 8 ming so‘m bilan olib borishsa, Elbayon orqali Sho‘rchi tumaniga olib chiquvchi 19 km yo‘lga 10 ming so‘m so‘rashadi. Sababi yo‘l buzuq va sifatsiz. Qolaversa, ayni kunda chang va yurib bo‘lmaydigan darajaga kelgan”, — deydi To‘xtamish Ibragimov.

Qumqo‘rg‘on tuman yo‘llardan foydalanish unitar korxonasi mas’ul xodimi Husan Rahimovning ma’lumot berishicha, yo‘l ta’miri haqiqatan ham 2020-yil yanvar oyida boshlangan bo‘lib, barcha me’yoriy talablar asosida bajarilmoqda.

“Aholida norozilik kuzatilayotgani bor gap. Shu bois ham aholi yo‘lning ta’mirlanishiga to‘sqinlik qilmoqda. Biroq biz ‘Termizavtoyo‘l’ MChJ tomonidan belgilangan me’yoriy talablar asosida ish bajaryapmiz. Lekin buni odamlarga tushuntirolmayapmiz. Odamlar tushunishni istamayapti”, — deydi Husan Rahimov.

Husan Rahimov aholining qurilish ishlari ketayotgan paytda yo‘l belgilari o‘rnatilmagani to‘g‘risidagi e’tirozini eshitgach, “yo‘l belgilarini o‘zimiz bilan olib kelib, yana olib ketyapmiz. Ta’mirlash ishlari bajarilayotgan paytda belgilar o‘rnatilayapti”, deya javob berdi.

Aholining qo‘shimcha qilishicha, mazkur mahalla tuman IIB boshlig‘i rahbarligidagi uchinchi sektor hududi bo‘lib, aholi sektor rahbarini tanimaydi. Uning faoliyatidan bexabar.

“Sektor boshlig‘i kimligini bilmaymiz va tanimaymiz. Besh yil davomida umuman ko‘rmaganmiz. Mahallamizga kelganini ham bilmaymiz”, — deydi Chori Zoirov.

Tuman IIB boshlig‘i, uchinchi sektor rahbarini taniydigan To‘xtamish Ibragimov esa qulab tushgan ko‘prik masalasiga e’tibor qaratgan IIB boshlig‘i muammoni o‘rganib, tez orada hal etishini ma’lum qilganini, biroq muammo haligacha yechim topmaganini bildirmoqda.

Bu haqda gapirgan O‘tkir Xolmatov va Odina bobo Abdurahimovlar ko‘prikka 6,5 milliard so‘m sarflangan bo‘lsa-da, ish sifatsiz bajarilgani sabab ko‘prik “umri qisqa” bo‘lganini ta’kidladi.

“Mana shu ko‘prik 1 yil 7 oy deganda shunday ‘avariya’ holatiga kelib qoldi. Holbuki, bu ko‘prikka 6,5 milliard so‘m sarflangandi. Ish sifatsiz bajarilgani uchun ko‘prikning “umri qisqa” bo‘ldi. Biz yo‘limiz ham shunday sifatsiz ta’mirlanib, hech qancha vaqt o‘tmasdan yaroqsiz holga kelishidan qo‘rqyapmiz”, — deydi Odina bobo Abdurahimov.

Qumqo‘rg‘on tuman hokimligi axborot xizmati rahbari Nigora Jumayeva bilan muloqotda tuman hokimining qurilish masalalari bo‘yicha o‘rinbosari mazkur holatga izoh berishini so‘radik. Nigora Jumayeva hokim o‘rinbosari voqea joyiga yetib borishini, jurnalistni qiziqtirgan savollarga javob berishini ma’lum qildi. Biroq hokim o‘rinbosari voqea joyiga kelmadi. Telefon orqali ham mas’ulga bog‘lana olmadik.