2020-yil 28-oktabr kuni ijtimoiy tarmoqlarda Namangandagi Grand Sherdor mehmonxonasi oldida ko‘tarilgan Fransiya bayrog‘i olib tashlangani to‘g‘risida xabarlar tarqaldi. Bu haqda “Daryo” muxbiri Azizbek Abduvaliyev ma’lum qildi.
Mehmonxona menejeri Komiljon Begmatovning ma’lum qilishicha, mehmonxona oldiga jami 7 ta — Grand Sherdor, O‘zbekiston, AQSh, Qozog‘iston, Fransiya, Yevroittifoq va Rossiya bayroqlari ilingan. 28-oktabr kuni soat 13:20 da mehmonxona oldidagi barcha bayroq, jumladan, O‘zbekiston bayrog‘i ham yechib olingan.
Shu kuni soat 16:30 da bayroqlar yuvilib, dazmollanib, qaytadan joyiga ilingan.
“Har oy yakunida mehmonxona oldida bayroqlar yechib olinib, yuvib, keyin joyiga ilib qo‘yiladi. Bu biz uchun odatiy jarayon hisoblanadi. Bayroqlar qatorida Fransiya bayrog‘i birinchi o‘rinda turgani uchun shunday shov-shuvlar tarqalib ketgan. Bayroqning kimdir tomonidan yulib, so‘ng toptab tashlangani haqidagi gaplar esa mantiqqa to‘g‘ri kelmaydi. Chunki kuzatuv kameralari, qolaversa, qo‘riqchilar bor”, — deydi Komiljon Begmatov.
Menejerga ko‘ra, vodiydagi ilk butik-otel bo‘lgan mehmonxonani Fransiya bilan yaxshi aloqalar bog‘lab turadi. O‘tgan yili ham bir guruh fransuz sayyohlari bu yerda bo‘lib, iliq taassurotlar bilan yurtlariga qaytishgan.
Izoh (0)