O‘zbekistonning Latviyadagi elchisi Qadamboy Sultonov 29-oktabr kuni Estoniya prezidenti Kersti Kalyulaydga ishonch yorliqlarini topshirdi, deb xabar beradi “Dunyo” agentligi. U O‘zbekistonning Estoniyadagi birinchi elchisiga aylandi (qarorgohi Riga shahrida).
Mamlakat rahbarining “Kardiorg” saroyida o‘tkazilgan marosimda prezident Kersti Kalyulayd Estoniyada ilk bor o‘z elchisini tayinlash orqali o‘zbek—eston hamkorligini yangi darajaga ko‘targan O‘zbekiston rahbariyatiga minnatdorchilik bildirdi.
“Diplomatik qamrovning kengayishi, avvalambor, O‘zbekiston va dunyo mamlakatlari o‘rtasidagi har tomonlama hamkorlikni rivojlantirishga iqtisodiy qiziqish tobora ortib borayotganligining dalilidir”, — deydi Estoniya prezidenti.
Qadamboy Sultonov 2019-yilning kuzidan beri O‘zbekistonning Latviyadagi elchisi hisoblanadi. 2020-yilning 27-avgust kuni u rasman O‘zbekistonning Finlyandiyadagi elchisi sifatida akkreditatsiyadan o‘tgandi.
Izoh (0)