Самарқанд шаҳридан ўтган М-39 автомобиль йўлининг 1083-километрида янги йўл ўтказгич «Ўзбекистон темир йўллари» АЖнинг «Кўприкқурилишлойиҳа» корхонаси ҳамда Россиянинг етакчи мутахассислари билан ҳамкорликда тайёрланган лойиҳа асосида барпо қилинмоқда. Бу ҳақда акциядорлик жамиятининг матбуот хизмати хабар берди.
Лойиҳага кўра, йўл ўтказгичнинг баландлиги 5,5, узунлиги 110, кенглиги эса 28,9 метрни ташкил этиб, иншоотдан икки томонга йўналиш бўйлаб иккита сезд мавжуд. Ушбу йўл ўтказгич фойдаланишга топширилгач, бир соатда қарийб 600 га яқин, бир суткада эса 14 мингта автомобилни ўтказиш имконияти яратилади. Амалга оширилаётган лойиҳанинг оралиқ қурилмаси кесимсиз уч оралиқли балка бўлиб, қурилиш баландлиги бўйича ўзгарувчан бўлади. Икки четидаги оралиқ қурилманинг узунлиги 33 метр, ўртадаги оралиқ қурилманинг узунлиги эса 42 метрдан иборат бўлади. Мазкур йўл ўтказгичга жами 6000 метр куб бетон ётқизиш ишлари мўлжалланган бўлиб, ҳозирги кунга қадар 3000 метр куб бетон ётқизилди.
«Деформацион чоклар резина-металли қоплама туридан иборат бўлиб, ўтказгичнинг эни ва узунлиги бўйлаб ҳаракатланишига имконият беради ва автомобилларнинг текис ва равон ҳаракатланишига замин яратади. Мутахассисларнинг айтишича, бундай деформацион чоклар биринчи маротаба ишлатилмоқда», — дейилади хабарда.
Монолит оралиқ қурилма ҳам яхлит ҳавозаларда 2 босқичда қурилади. Дастлаб бир йўналишда учта ҳаракат йўли, иккинчи йўналишда худди шунча ҳаракат йўли қурилади. Ушбу йўл ўтказгич қурилишини «Кўприкқурилиш трести» корхонасининг 200 нафар мутахассиси замонавий техника ва ускуналардан фойдаланган ҳолда амалга оширмоқда.
Маълумот учун, мазкур корхона мутахассислари сўнгги 5—10 йил давомида фақат пойтахтнинг ўзида кўплаб йирик лойиҳалар амалга оширилган. Хусусан, Ғофур Ғулом ва Абдулла Қодирий кўчалари кесишмасидаги йирик транспорт ечими, Муқимий ва Шота Руставели кўчалари кесишмасидаги ёйсимон шаклидаги йўл ўтказгич, «Нoвза» ва «Мирзо Улуғбек» метро бекатлари яқинидаги кўприклар, Оқтепа майдонида йўл-транспорт ечими, Тараққиёт кўчасини кесиб ўтувчи автомобиль ва темир йўл кўприклари, Оҳангарон шоссеси ва Махтумқули кўчаси кесишмасидаги янги уч поғонали йўл ўтказгичи шулар сирасига киради.
Мавзуга доир: Самарқанд шаҳрини Жомбой ва Оқдарё туманлари билан боғлайдиган кўприк қуриб битказилди
Изоҳ (0)