Parkent hokimligi sisterna yorilishidan jabr ko‘rganlarga yordam ko‘rsatishga va’da berdi

Parkent tumani hokimligi tomonidan “Aviasozlar” bog‘dorchilik-uzumchilik shirkatidagi suv sisternasining yorilishi oqibatida jabr ko‘rgan aholiga yordam ko‘rsatish bo‘yicha komissiya tuzildi. Bu haqda viloyat hokimligi matbuot xizmati xabar berdi.

Eslatib o‘tamiz, 20-oktabr kuni Parkent tumani “Aviasozlar” bog‘dorchilik-uzumchilik shirkati hududidagi aholini ichimlik suvi bilan ta’minlaydigan suv yig‘ish rezervuarining yorilishi oqibatida suv toshqini sodir bo‘lgan. Mazkur shirkat 629 ta dala hovliga xizmat ko‘rsatadi. Oqibatda 17 ta dala hovliga suv kirgan. Xususan, rezervuar yaqinida joylashgan 7 ta dala hovli jiddiy zarar ko‘rgan.

Viloyat hokimligining ma’lum qilishicha, shirkat hududidagi 1977-yilda qurilgan suv yig‘ish rezervuari (2000 metr kub sig‘imga ega) ko‘p yillardan beri foydalanilganligi bois ta’mirtalab holatda bo‘lgan, temir konstruksiyalarining mustahkamlik darajasi yo‘qolganligi tufayli avariya holati ro‘y bergan.

Komissiya tarkibidan tuman hokimining birinchi o‘rinbosari, moliya bo‘limi, tuman bosh me’mori, yer resurslari va ko‘chmas mulk kadastri, bandlikka ko‘maklashish markazi, uy-joy kommunal xizmat ko‘rsatish bo‘limi mutasaddilari kirgan.

“Ular shirkat rahbari va shirkat a’zolari bilan ko‘rilgan zarar miqdorini aniqlaydi. Albatta, zarar ko‘rgan dala hovlilarning bino va inshootlarini ta’mirlash choralari ko‘riladi”, — deyiladi xabarda.

Shuningdek, bugungi kunda tuman elektr tarmoqlari, gaz ta’minoti, “Suvoqava” filiali korxonalari tomonidan sohalar bo‘yicha ta’minot tizimlarining holati o‘rganilib, zarar ko‘rgan dala hovlilarda kommunal tarmoqlarni tiklash-ta’mirlash ishlariga kirishilgan.

“Holat bo‘yicha hali birorta hujjat ham taqdim etilmadi. Birinchi kuni odam ko‘p edi, ammo ularni voqeaga nima sabab bo‘lgani qiziqtirdi. Bizga yetkazilgan zarar bo‘yicha esa rasman hech narsa yo‘q. Nima bo‘lganini hech kim so‘ramadi, ro‘yxatgayam olmadi va hokazo”, — deydi kira Dobroskok.

Bahodir Alimovning so‘zlariga ko‘ra, u hokimiyatdan ko‘rsatilgan yordam bo‘yicha hech narsa bilmaydi. U hozirda darvoza va panjaralarni tiklab, shuningdek, yetmayotgan oynalarni o‘z hisobidan o‘rnatib bo‘lgan.

Shirkat raisi Ulug‘bek Abdullayevning ma’lum qilishicha, yetkazilgan zarar hisoblab chiqilgach u hokimiyatga smeta yuboradi. Uning so‘zlariga ko‘ra, dala hovlilar qayta tiklanadi va homiylar yoki budjet hisobidan ta’mirlanadi.

“Hozircha xususiy uylarga yetgan zararni hisoblayapmiz. Bu sisternaga taalluqli emas”, — deydi Ulug‘bek Abdullayev.