Паркент тумани ҳокимлиги томонидан «Авиасозлар» боғдорчилик-узумчилик ширкатидаги сув цистернасининг ёрилиши оқибатида жабр кўрган аҳолига ёрдам кўрсатиш бўйича комиссия тузилди. Бу ҳақда вилоят ҳокимлиги матбуот хизмати хабар берди.
Эслатиб ўтамиз, 20 октябрь куни Паркент тумани «Авиасозлар» боғдорчилик-узумчилик ширкати ҳудудидаги аҳолини ичимлик суви билан таъминлайдиган сув йиғиш резервуарининг ёрилиши оқибатида сув тошқини содир бўлган. Мазкур ширкат 629 та дала ҳовлига хизмат кўрсатади. Оқибатда 17 та дала ҳовлига сув кирган. Хусусан, резервуар яқинида жойлашган 7 та дала ҳовли жиддий зарар кўрган.
Вилоят ҳокимлигининг маълум қилишича, ширкат ҳудудидаги 1977 йилда қурилган сув йиғиш резервуари (2000 метр куб сиғимга эга) кўп йиллардан бери фойдаланилганлиги боис таъмирталаб ҳолатда бўлган, темир конструкцияларининг мустаҳкамлик даражаси йўқолганлиги туфайли авария ҳолати рўй берган.
Комиссия таркибидан туман ҳокимининг биринчи ўринбосари, молия бўлими, туман бош меъмори, ер ресурслари ва кўчмас мулк кадастри, бандликка кўмаклашиш маркази, уй-жой коммунал хизмат кўрсатиш бўлими мутасаддилари кирган.
«Улар ширкат раҳбари ва ширкат аъзолари билан кўрилган зарар миқдорини аниқлайди. Албатта, зарар кўрган дала ҳовлиларнинг бино ва иншоотларини таъмирлаш чоралари кўрилади», — дейилади хабарда.
Шунингдек, бугунги кунда туман электр тармоқлари, газ таъминоти, «Сувоқава» филиали корхоналари томонидан соҳалар бўйича таъминот тизимларининг ҳолати ўрганилиб, зарар кўрган дала ҳовлиларда коммунал тармоқларни тиклаш-таъмирлаш ишларига киришилган.
«Gazeta.uz» жабр кўрган дала ҳовлилар эгалари — Кира Доброскок (497-уй) ва Баҳодир Алимов (495-уй) билан боғланган. Уларнинг сўзларига кўра, ҳозирча ҳеч ким ҳеч қандай ёрдам кўрсатмаган.
«Ҳолат бўйича ҳали бирорта ҳужжат ҳам тақдим этилмади. Биринчи куни одам кўп эди, аммо уларни воқеага нима сабаб бўлгани қизиқтирди. Бизга етказилган зарар бўйича эса расман ҳеч нарса йўқ. Нима бўлганини ҳеч ким сўрамади, рўйхатгаям олмади ва ҳоказо», — дейди кира Доброскок.
Баҳодир Алимовнинг сўзларига кўра, у ҳокимиятдан кўрсатилган ёрдам бўйича ҳеч нарса билмайди. У ҳозирда дарвоза ва панжараларни тиклаб, шунингдек, етмаётган ойналарни ўз ҳисобидан ўрнатиб бўлган.
Ширкат раиси Улуғбек Абдуллаевнинг маълум қилишича, етказилган зарар ҳисоблаб чиқилгач у ҳокимиятга смета юборади. Унинг сўзларига кўра, дала ҳовлилар қайта тикланади ва ҳомийлар ёки бюджет ҳисобидан таъмирланади.
«Ҳозирча хусусий уйларга етган зарарни ҳисоблаяпмиз. Бу цистернага тааллуқли эмас», — дейди Улуғбек Абдуллаев.
Изоҳ (0)