Ijtimoiy tarmoqlarda Andijon va Samarqand viloyatlarida maktabgacha ta’lim bo‘limlarida sifatsiz ko‘mirdan ayollar “qo‘lbola briket” tayyorlayotgan suratlar tarqaldi. Ma’lum bo‘lishicha, ikkala viloyat ham “O‘zbekko‘mir” AJ filiallaridan jami 6,65 ming tonna ko‘mir xarid qilgan.
Davletovuz’ning Davlat xaridlari portali ma’lumotlariga tayanib yozishicha, Andijon viloyati maktabgacha ta’lim boshqarmasi “O‘zbekko‘mir” AJning “Andijon ko‘mir yetkazib beruvchi” filialidan 7 milliard 624 million so‘mga 5 ming 171 tonna ko‘mir (BR) hamda 14 ming 718 tonna ko‘mir briket xarid qilgan.
Samarqand viloyati maktabgacha ta’lim boshqarmasi tomonidan esa “O‘zbekko‘mir” AJning “Samarqand ko‘mir yetkazib beruvchi” filialidan 964 million so‘mga 894 tonna ko‘mir (BR) hamda 1 ming 686 tonna ko‘mir briket xarid qilingan. Bundan tashqari, “Ko‘mir ta’minot” MChJdan 354 million so‘mga 859 tonna briket sotib olingan.
“Barcha xaridlarda ko‘mir sifatli va davlat standartlariga javob berishi kerakligi belgilangan. Shunday ko‘mirni sotayotgan ‘O‘zbekko‘mir’ o‘rganilishi kerak. Budjet puliga sifatli mahsulot olinishi lozim”, — deyiladi xabarda.
Avvalroq “O‘zbekko‘mir” AJ budjet tashkilotlariga ko‘mir yetkazib berish rejasini muddatidan oldin bajargani, 26-oktabr holatiga ko‘ra budjet sohalari ehtiyojlari uchun 405 ming 400 tonna qattiq yoqilg‘i yetkazib berilgani to‘g‘risida xabar berilgandi.
Izoh (0)