2-noyabrdan 10-noyabrgacha O‘zbekistondagi tug‘ma yurak nuqsoni barcha bemorlar akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi, Konsultativ poliklinikasida bepul tekshirilib, tashxis oladi. Bu haqda markaz mas’ullari ma’lum qildi.
Konsultativ poliklinika bo‘limi mudiri, tibbiyot fanlari nomzodi Said G‘anixo‘jayevning aytishicha, aksiyadan ko‘zlangan asosiy maqsad koronavirus pandemiyasi tufayli respublika hududida o‘z vaqtidagi tibbiy yordam olish uchun harakatlana olmagan, xorijga davolanishga chiqa olmagan tug‘ma yurak nuqsoni bor bemorlarga yengillik yaratish, sog‘lig‘ini tiklash va sog‘lom hayotga qaytarishga ko‘maklashishdan iborat. Tibbiyot xodimlari kuni munosabati bilan tashkil etilayotgan aksiya keyinchalik viloyatlarda ham davom ettirilishi ko‘zlangan.
Bu aksiyani faqat bizning markazimizda emas, har bir viloyatda mas’ul guruhlar, mas’ul jarrohlar sayyor brigadalar shaklida joylarga chiqib bemorlarni qabul qiladi, operatsiya qiladi, tashxis qo‘yadi, maksimal darajada yashash joyida yordam berishga harakat qiladi. Aksiyadan so‘ng, masalan, birinchi bo‘lib Qoraqalpog‘istonga jarrohlar, anesteziologlar, reanimatologlar, ultratovush tekshiruvchi endoskopistlar kabi 10 tadan 15 tagacha mutaxassisdan iborat sayyor brigada borib, bemorlarni qabul qiladi, tekshirib, tashxis qo‘yib, kerak bo‘lsa operatsiya o‘tkazadi.Aksiya doirasida kelgan bemorlarga tashxis qo‘yiladi, exokardiografiya, elektrokardiografik tekshiruv orqali tekshiriladi, tavsiyalar beriladi, zaruriyat tug‘ilsa, operatsiya qilinadi. Operatsiyaga ehtiyoji borligi aniqlangan bemorlarga tegishli yo‘llanma berilib, keyinchalik brigadalarning joylarning o‘zida operatsiyaga borishi tashkil qilinadi.Said G‘anixo‘jayev, Konsultativ poliklinika bo‘limi mudiri, tibbiyot fanlari nomzodi
“Ming afsuski, aholining eng nozik, qiynalgan qatlamlaridan biri, juda og‘ir bemorlar tug‘ma yurak nuqsoni borlar sanaladi. Statistika bo‘yicha turli adabiyotlarda har mingta tug‘ilgan bolaning 4 tadan 8 nafariga tug‘ma yurak nuqsoni to‘g‘ri keladi. Respublikamizda har yili o‘rta hisobda 700 ming chaqaloq tug‘iladigan bo‘lsa, ularning 6 foizi tug‘ma yurak nuqsoni bilan tug‘iladi. 2019-yilda tug‘ma yurak nuqsonlari bo‘limida mingga yaqin eng qiyin texnologik operatsiya qilindi. Bo‘lim ikki qismdan iborat: birinchi qismda 20 ta o‘rinda tug‘ma yurak nuqsoni bilan dunyoga kelgan chaqaloqlar va 3 yoshgacha bo‘lgan go‘daklarga ajratilgan. Asosiy korpusda yana 40 kishilik joy bor”,— deydi G‘anixo‘jayev.
Bundan tashqari, 2-noyabrdan e’tiboran akademik V.Vohidov nomidagi RIXIIATM ikki smenada, ya’ni soat 08:00 dan 14:00 gacha va 14:00 dan 18:00 gacha faoliyat olib borishi ma’lum qilindi. Ayni paytda markazda oltita yurak jarrohligi bo‘limi mavjud bo‘lib, katta yoshdagi bemorlarda revmatizmdan keyin kelib chiqadigan yurak klapanlarini almashtirish, infarkt miokardi bo‘lgan kasallarni stentlash yoki ochiq usulda aorto-koronar shuntlash amaliyotlari o‘tkazib kelinmoqda.
Izoh (0)