“Jami 198 mingta kepka xarid qilingan”. DTM rasmiysi 13,4 mlrd so‘mlik kepkalar xarid qilingani to‘g‘risidagi xabarlarga izoh berdi

Davlat test markazi sentabr oyida test sinovlarini o‘tkazishda abituriyentlarga tarqatish uchun to‘g‘ridan to‘g‘ri shartnoma tuzish orqali 13,4 milliard so‘mlik kepka, qo‘lqop, tibbiy niqob, suv va ruchka xarid qilgani to‘g‘risida xabar berilgandi. AOKAda o‘tkazilgan matbuot anjumanida DTM direktori o‘rinbosari Sardor Rajabov markaz tomonidan jami 198 mingta kepka xarid qilinganini ma’lum qildi.

Testlar boshlanishidan oldin o‘tkazilgan matbuot anjumanida kepka sotib olish uchun tegishli ruxsatnoma sal kechikayotganligi sababli bosh kiyim berish yoki bera olmasligimiz aniq emasligi to‘g‘risida ma’lumot berilgandi. U tasdiqlangach, 1,3 million abituriyentga kepka yetkazib berish uchun 7 ta korxona bilan ishlaganmiz.

…Barchaga kepka yetkazib berila olmadi. DTM tomonidan jami 198 mingta kepka xarid qilingan. Ijtimoiy tarmoqlarda “Boburxon bn Nodirxon” degan korxona bilan tuzilgan shartnoma nusxasi qo‘yilgan. Ular bilan 1 millionta kepka yetkazib berish bo‘yicha shartnoma tuzilgan, lekin bu tashkilot tomonidan bor-yo‘g‘i 69 506 ta kepka taqdim etilgan. Boshqa kepka yetkazib bera olmagan. Bizga taqdim etilgan narxlarni orasidagi eng past narx shularga tegishli edi.

Qolgan tashkilotlar bilan shartnoma tuzishga mahalliy hokimliklar yordam berdi. Ular o‘zidagi kepka ishlab chiqaradigan korxonalar bilan shartnoma tuzib bizga yubordi, DTM esa pulini to‘lab bergan.

“Boburxon bn Nodirxon” bilan 7 milliard so‘mga tuzilgan shartnoma bajarilmagani sababli 69 506 ta kepka uchun pul to‘langan.

Sardor Rajabov, DTM direktori o‘rinbosari

Davlat xaridlari portal ma’lumotlariga ko‘ra, DTM respublika bo‘ylab test sinovlarini o‘tkazishga jalb qilingan xodimlarning ovqatlanishiga 1 milliard 550 million so‘mga yaqin mablag‘ sarflangan.Eslatib o‘tamiz, Davlat test markazi direktori Majid Karimov 12-avgustda oliy ta’lim muassasalariga kirish uchun o‘tkaziladigan imtihonlar vaqtida abituriyentlarga tibbiy vositalar, ruchka va ichimlik suvi bepul berilishi, shuningdek vaziyat e’tiborga olinib, ularga bosh kiyim berish rejalashtirilayotganini ma’lum qilgandi. U mazkur buyumlarning hammasi davlat tomonidan bepul berilishini aytgan va bosh kiyim ham tekinga berilishini qo‘shimcha qilgan. Keyinchalik DTM axborot xizmati 2020/2021-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari ochiq maydonlarda tashkil etilayotgani sababli, abituriyentlar xohishiga ko‘ra test sinovlariga bosh kiyim (kepka) bilan kelishlari mumkinligini bildirgan. 2-sentabrda Farg‘onada imtihonga kelgan abituriyentlarga do‘ppi tarqatilgan.