O‘zbekistonda chaqaloqlarning tug‘ma yurak nuqsoni bilan tug‘ilishiga onalarning saharda ko‘cha supurib shamollashi ham sabab bo‘layotgani aytildi

Homiladorlikning ilk uch oyida saharda turib ko‘cha supurgan kelinlarning aksariyati shamollash natijasida tug‘ma yurak nuqsoni bor farzandlarni dunyoga keltirmoqda. Bu haqda akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazining tug‘ma yurak nuqsonlari bo‘lim boshlig‘i Umidjon Murodov aytib o‘tgan.

Tug‘ma yurak nuqsoni kelib chiqishi nazariyasi ustida olimlar juda ko‘p izlanishlar olib borishgan. Eng asosiy nazariya bu — infeksion kasalliklar oqibatida kelib chiqishidir. Statistikaga e’tibor beradigan bo‘lsak, birinchi yoki ikkinchi farzandlarda tug‘ma yurak nuqsonlari kelib chiqadi. Sabablardan asosiysi, homiladorlik paytining ilk 3 oyida yurak rivojlanadi. Bizda, o‘zbekchilikda, yangi kelinlar shu davrda shamollasa, “yengil gripp bo‘ldim”, deb qandaydir infeksion kasalliklar bilan o‘tkazadi. O‘zbekchilik deymiz, saharda kelinlar turib ko‘cha supuraman, deydi yoki yengil kiyinib tashqariga chiqib qo‘yadi. Shuning hisobiga yengil shamollaydi. Homiladorlikning ilk 3 oyidan so‘ng onadagi kasallik bolaning yuragiga ta’sir etmaydi. Chunki bolada yurak shakllanib bo‘ladi.

Umidjon Murodov, Tug‘ma yurak nuqsonlari bo‘lim boshlig‘i

“Respublikamizda yiliga 600 ming nafarga yaqin chaqaloq tug‘ilsa, shulardan 5 ming nafarga yaqin chaqaloq tug‘ma yurak nuqsoni bilan tug‘iladi. Ularning 60 foizi 1 yoshgacha bo‘lgan holatda jarrohlik amaliyotiga muhtoj hisoblanadi. Ulardan eng ko‘p uchraydiganlari qorinchalararo va bo‘lmachalararo devor deffekti, ochiq arterial yo‘l, yurak qon-tomirlari transpozitsiyasi”, — deydi mutaxassis.

Eslatib o‘tamiz, 2-noyabrdan 10-noyabrgacha O‘zbekistondagi tug‘ma yurak nuqsoni bor barcha bemorlar akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi, konsultativ poliklinikasida bepul tekshirilib, tashxis olishi mumkin.