Ҳомиладорликнинг илк уч ойида саҳарда туриб кўча супурган келинларнинг аксарияти шамоллаш натижасида туғма юрак нуқсони бор фарзандларни дунёга келтирмоқда. Бу ҳақда академик В.Воҳидов номидаги Республика ихтисослаштирилган хирургия илмий-амалий тиббиёт марказининг туғма юрак нуқсонлари бўлим бошлиғи Умиджон Муродов айтиб ўтган.
Туғма юрак нуқсони келиб чиқиши назарияси устида олимлар жуда кўп изланишлар олиб боришган. Энг асосий назария бу — инфекцион касалликлар оқибатида келиб чиқишидир. Статистикага эътибор берадиган бўлсак, биринчи ёки иккинчи фарзандларда туғма юрак нуқсонлари келиб чиқади. Сабаблардан асосийси, ҳомиладорлик пайтининг илк 3 ойида юрак ривожланади. Бизда, ўзбекчиликда, янги келинлар шу даврда шамолласа, «енгил грипп бўлдим», деб қандайдир инфекцион касалликлар билан ўтказади. Ўзбекчилик деймиз, саҳарда келинлар туриб кўча супураман, дейди ёки енгил кийиниб ташқарига чиқиб қўяди. Шунинг ҳисобига енгил шамоллайди. Ҳомиладорликнинг илк 3 ойидан сўнг онадаги касаллик боланинг юрагига таъсир этмайди. Чунки болада юрак шаклланиб бўлади.Туғма юрак нуқсони касаллиги туғилаётган чақалоқларнинг ҳар минг нафаридан бир нафарида учраши мумкин. Улардан 30-40 фоизига ўз вақтида ёрдам кўрсатилмаса, 3 ёшга тўлгунича нобуд бўлади.Умиджон Муродов, Туғма юрак нуқсонлари бўлим бошлиғи
«Республикамизда йилига 600 минг нафарга яқин чақалоқ туғилса, шулардан 5 минг нафарга яқин чақалоқ туғма юрак нуқсони билан туғилади. Уларнинг 60 фоизи 1 ёшгача бўлган ҳолатда жарроҳлик амалиётига муҳтож ҳисобланади. Улардан энг кўп учрайдиганлари қоринчалараро ва бўлмачалараро девор деффекти, очиқ артериал йўл, юрак қон-томирлари транспозицияси», — дейди мутахассис.
Эслатиб ўтамиз, 2 ноябрдан 10 ноябргача Ўзбекистондаги туғма юрак нуқсони бор барча беморлар академик В.Воҳидов номидаги Республика ихтисослаштирилган хирургия илмий-амалий тиббиёт маркази, консултатив поликлиникасида бепул текширилиб, ташхис олиши мумкин.
Изоҳ (0)