O‘zbekistonda 2020-yilning 9 oyida 60 mingga yaqin fuqaroga ishsizlik nafaqasi to‘langan, 500 mingdan ortiq ishsiz fuqaro jamoat ishlariga jalb etilgan. Mamlakatdagi jami ishsizlar soni esa, 1-yarim yillik yakunlari bo‘yicha, 1,9 million kishini tashkil etgan. Bu haqda Bandlik va mehnat munosabatlari vazirligi boshqarma boshlig‘i Temur Mahmudovga tayanib, “Kun.uz” ma’lum qildi.
Vazirlik vakilining so‘zlariga ko‘ra, birinchi yarim yillikda ishsizlik 13,2 foizni tashkil etgan, ya’ni 2 millionga yaqin fuqaro ishga muhtoj deb hisoblangan.
“9 oy davomida O‘zbekistonda 60 mingga yaqin fuqaro ishsiz deb e’tirof etilgan va ularga ishsizlik nafaqasi tayinlangan.
Shu bilan birga, jamoat ishlarini ham aytib o‘tish kerak. Ya’ni ish so‘rab murojaat qilgan fuqarolarni ijtimoiy yo‘naltirilgan mehnatga jalb qilish uchun ham fond (Bandlikka ko‘maklashish jamg‘armasi – tahr.) mablag‘laridan samarali foydalanamiz. Sababi ishsizlik nafaqasi bersak ham, bo‘ladi yoki ishsiz fuqarolarga o‘zlariga ma’qul sohada yo uyiga yaqin joyda haq to‘lanadigan jamoat ishlariga jalb qilsak ham, bo‘ladi.
Bu yil biz ko‘proq jamoat ishlariga jalb qilishga asosiy urg‘u berdik. 500 mingdan ortiq ishsiz fuqarolarni jamoat ishlariga jalb qildik, ularga 450 milliard so‘mga yaqin mablag‘ to‘lab berdik”, – dedi Temur Mahmudov 28-oktabr kuni AOKAdagi matbuot anjumanida.
Ishsizlik nafaqasi kimlarga to‘lanadi?
Mehnat kodeksiga ko‘ra, ishsizlik nafaqasi ishsiz deb e’tirof etilgan shaxsga, u ish qidirayotgan shaxs sifatida mahalliy mehnat organida ro‘yxatdan o‘tgan kundan e’tiboran tayinlanadi.
Agar ishsiz fuqaro 35 yoshga to‘lmagan erkak bo‘lib, uning qaramog‘idagilar soni 3 nafargacha bo‘lsa, u ishsizlik nafaqasi olish uchun haq to‘lanadigan jamoat ishlarida belgilangan tartibda ishtirok etishi talab etiladi.
Ishsizlik nafaqasi miqdori qancha?
O‘zbekistonda 23-oktabr kuni “Aholi bandligi to‘g‘risida” qonun qabul qilindi. 3 oydan keyin kuchga kiradigan qonunga asosan, ishsizlik nafaqalari quyidagi miqdorlarda oshiriladi:
- ishdan va ish haqidan so‘nggi 12 oylik davr ichida mahrum bo‘lgan shaxslarga – avvalgi ish joyidagi o‘rtacha oylik ish haqining 50 foizi miqdorida, lekin mehnatga haq to‘lashning eng kam miqdori (679 330 so‘m)dan oz bo‘lmagan miqdorda (amaldagisi – MHEKMning 35,2 foizidan oz bo‘lmagan miqdorda);
- ishdan va ish haqidan mahrum bo‘lgan hamda uzoq (12 oydan ortiq) tanaffusdan keyin mehnat faoliyatini qayta boshlashga harakat qilayotgan shaxslarga – MHEKMning 1 baravari miqdorida (amaldagisi – MHEKMning 26,5 va 35,2 foizidan oz bo‘lmagan miqdorlarda);
- ilgari ishlamagan, birinchi marta ish qidirayotgan shaxslarga – MHEKMning kamida 75 foizi miqdorida (amaldagisi – MHEKMning kamida 26,5 foizi miqdorida). Ish stajini hujjat bilan tasdiqlash imkoniyati bo‘lmagan shaxslarga ham shu miqdorda nafaqa to‘lanadi.
Avvalroq O‘zbekistonda yanvar–iyun oylarida ham ishsizlik darajasi 13,2 foizni tashkil etgani xabar qilingandi.
Izoh (0)