Ijtimoiy tarmoqlarda “Shofirkonlik shifokorlar yig‘-yig‘lardan charchadi” sarlavhali xabar tarqalgach “Daryo” muxbiri “Yuksalish” umummilliy harakatining Buxoro viloyati bo‘limi bilan hamkorlikda surishtiruv o‘tkazdi.
Ma’lum bo‘lishicha, Buxoro viloyatining Shofirkon tuman tibbiyot birlashmasiga qarashli ko‘p tarmoqli poliklinikaning 47 nafar shifokori poliklinikaning eskirgan va ko‘rimsiz ahvolga kelgan o‘rindiqlariga oq choyshab o‘rash maqsadida 10 ming so‘mdan pul yig‘gan. Pul ro‘yxat shaklida, imzo orqali, ustiga-ustak, na buyruq, na kasaba uyushmasi qarorisiz noqonuniy yig‘ilgan.
Shundan so‘ng ijtimoiy tarmoqlarda “Buxoro viloyatining Shofirkon tumani tibbiyot birlashmasiga qarashli ko‘p tarmoqli shifoxona xodimlari bor-yo‘g‘i 1,2 million so‘mgacha maosh olishadi. Hozirgi sharoitda bu mablag‘ning kulgili ekanini tushunish uchun katta aql kerakmas. Xarajatlardan tashqari, ro‘zg‘orga ana shu pulning teng yarmi kiradi. ‘O‘lganning ustiga tepgan’ deganlaridek, poliklinikamiz mudiri Aziz Nosirovning qabulxonasidagi ‘stul’lar qoplamasi uchun shifokorlardan 10 mingdan pul yig‘ilyapti. Bunaqa ‘yig‘-yig‘lar’ tinkamizni quritdi. Shofirkonda ham prokuror, boshqa idoralar bor. Kimdir e’tibor berarmikan?!” degan xabar tarqalgan.
Shofirkon tuman tibbiyot birlashmasiga qarashli ko‘p tarmoqli poliklinika mudiri Aziz Nosirov “Daryo” muxbiri bilan suhbatda ushbu xabarni unga yomonlik istaganlar tarqatganini aytdi. Poliklinika mudiriga ko‘ra, ijtimoiy tarmoqlarga xabar tarqalmasdan uch-to‘rt kun ilgari bir nechta bo‘lim shifokorlari uning qabuliga har bir bo‘lim shifokoridan o‘n ming so‘mdan pul yig‘ish orqali eskirgan va achinarli ahvolga kelgan o‘rindiqlarga oq choyshab o‘rash taklifi bilan kirgan. Biroq u masalani qonuniy yo‘l bilan hal etish kerakligini aytib, taklifni ham rad etmagan.
“Bor-yo‘g‘i 470 ming so‘m pul ortidan hech kim manfaatdor bo‘lishni istamagan. Ammo ishxonani ikkinchi uy sifatida ko‘rgan xodimlarimning xayrli tashabbusi, deya izn bergandim. Ammo o‘shandayam, ‘O‘zi arzimagan pul, bu tashabbusingiz noto‘g‘ri tarqalib ketmaydimi?’, deya xavotir ham olgandim. Mana, o‘ylaganim sodir bo‘ldi”, — deydi poliklinika mudiri.
Mazkur holat yuzasidan o‘tkazilgan yig‘inda “Yuksalish” umummilliy harakati Buxoro viloyati bo‘limi rahbari Hamza Ro‘ziyev noqonuniy xatti-harakat e’tiborsizlik tufayli, yetmagandek, poliklinika mudirining o‘zida huquqiy savodxonlik yetishmagani oqibatida yuzaga kelganini bildirdi.
“Rahbar bo‘la turib, jihozlar eskirganini yangilash uchun yig‘ilayotgan pulga qarshilik qilmay, jim turgansiz. Gap pulning miqdorida ham emas, gap shu holatning yuzaga kelganida. Bu tashabbus — noqonuniy xatti-harakat, o‘z xohishi bilanmi, kelishibmi, ixtiyoriymi, mumkin emas!”, — dedi Hamza Ro‘ziyev.
Aziz Nosirov esa bunga javoban shifokorlarning o‘zaro kelishganini, rozilik bilan pul yig‘ilganini, tazyiq yoki bosim, talab yo majburlash bo‘lmaganini bildirdi.
“To‘g‘ri, xabarim bor edi. Qabulimga kirib, ushbu masalani muhokama qilishdi. O‘zaro ko‘ngilli bo‘lib, pul yig‘ishdi. Obodlik ko‘ngildan boshlanadi, deyishadi-ku! Chunki bundan oldin ham o‘z hisobimizdan obodonlashtirish va ko‘chat olish masalasida shunday faollik ko‘rsatganmiz”,— dedi poliklinika mudiri.
Shuningdek, poliklinika mudiri noqonuniy xatti-harakat orqali yig‘ilgan pulga imzo olingan holatni “Tashabbusga shifokorlar ishtirokini bilish maqsadida hamda ‘kim berdi yoki kim bermadi’ nuqtayi nazaridan ro‘yxat qilingan” — deya izohladi.
Surishtiruvga ko‘ra, bundan ilgari ham poliklinikaning yosh mudiri ustidan “yozishgan”, ko‘p tortishuv va kelishmovchiliklar yuzaga kelgan.
Jarayonni birgalikda o‘rgangan viloyat moliya boshqarmasi vakili Fazliddin Zoyirovning bildirishicha, poliklinika tomonidan yil boshida boshqa xarajatlar ham rejalashtirib berilganda talabnoma o‘rganilib, pul ajratilgan bo‘lardi. Zoyirovning qo‘shimcha qilishicha, joriy yilning o‘zida Shofirkon tuman tibbiyot birlashmasiga qarashli ko‘p tarmoqli poliklinikaga birgina mebel jihozlari uchun 20 million so‘m mablag‘ ajratilgan.
“Ushbu tashabbus bo‘yicha kasaba uyushmasiga murojaat bo‘lmagan. Pul jamoaviy yig‘ilgan. Har bir masala kasaba uyushmasi bilan kelishilgan holda, uning roziligi asosida bo‘lishi kerak. Lekin bu jarayonda kasaba uyushmasining o‘rni bo‘lmagan, munosabat ham bildirmagan”, — dedi yig‘inda ishtirok etgan viloyat kasaba uyushmasi vakili.
“Daryo” muxbiri poliklinika mudirining pul yig‘ish bilan bog‘liq masalada “o‘zaro kelishgani, rozilik bilan yig‘ilgani, tazyiq, bosim, talab yoki majburlash bo‘lmagani” haqidagi gapi “topshiriq” bo‘yicha amalga oshirilgan xat bilan to‘g‘ri kelmayotganini aytib, buning sababi bilan qiziqdi.
Xatda ta’kidlanishicha, mazkur poliklinikaga tuman hokimi Shukrulla Hakimov kelgan va eskirgan o‘rindiqlarni oq choyshab bilan qoplash lozimligini bildirgan. Ushbu topshiriqni amalga oshirish esa noqonuniy xatti-harakat orqali amalga oshirilgan.Poliklinika mudiri Aziz Nosirov xatdagi “topshiriq” so‘zini “grammatik xato bo‘lishi mumkin” deya talqin etdi.
Muloqotda so‘z olgan shifokorlar yig‘ilgan pulni hech qanday xusumatsiz, xayrli tashabbus uchun yig‘ishganini, uning ortida manfaat yotmaganligini bildirdi. Shu o‘rinda, poliklinika jamoasi ijtimoiy tarmoqlarda “imzoli ro‘yxat”ni tarqatgan shaxsni huquq-tartibot idoralari tomonidan aniqlab, uning xatti-harakatiga nisbatan baho berish taklifini o‘rtaga tashladi.
“Ijtimoiy tarmoqda keltirilgan ma’lumotlar mantiqqa to‘g‘ri kelmaydi. Imkon bo‘lsa, holatga huquq-tartibot idoralari tomonidan aniqlik kiritilsa”, — dedi Aziz Nosirov.
Izoh (0)