Ўзбекистонда 2020 йилнинг 9 ойида 60 мингга яқин фуқарога ишсизлик нафақаси тўланган, 500 мингдан ортиқ ишсиз фуқаро жамоат ишларига жалб этилган. Мамлакатдаги жами ишсизлар сони эса, 1-ярим йиллик якунлари бўйича, 1,9 миллион кишини ташкил этган. Бу ҳақда Бандлик ва меҳнат муносабатлари вазирлиги бошқарма бошлиғи Темур Маҳмудовга таяниб, «Kun.uz» маълум қилди.
Вазирлик вакилининг сўзларига кўра, биринчи ярим йилликда ишсизлик 13,2 фоизни ташкил этган, яъни 2 миллионга яқин фуқаро ишга муҳтож деб ҳисобланган.
«9 ой давомида Ўзбекистонда 60 мингга яқин фуқаро ишсиз деб эътироф этилган ва уларга ишсизлик нафақаси тайинланган.
Шу билан бирга, жамоат ишларини ҳам айтиб ўтиш керак. Яъни иш сўраб мурожаат қилган фуқароларни ижтимоий йўналтирилган меҳнатга жалб қилиш учун ҳам фонд (Бандликка кўмаклашиш жамғармаси – таҳр.) маблағларидан самарали фойдаланамиз. Сабаби ишсизлик нафақаси берсак ҳам, бўлади ёки ишсиз фуқароларга ўзларига маъқул соҳада ё уйига яқин жойда ҳақ тўланадиган жамоат ишларига жалб қилсак ҳам, бўлади.
Бу йил биз кўпроқ жамоат ишларига жалб қилишга асосий урғу бердик. 500 мингдан ортиқ ишсиз фуқароларни жамоат ишларига жалб қилдик, уларга 450 миллиард сўмга яқин маблағ тўлаб бердик», – деди Темур Маҳмудов 28 октябрь куни АОКАдаги матбуот анжуманида.
Ишсизлик нафақаси кимларга тўланади?
Меҳнат кодексига кўра, ишсизлик нафақаси ишсиз деб эътироф этилган шахсга, у иш қидираётган шахс сифатида маҳаллий меҳнат органида рўйхатдан ўтган кундан эътиборан тайинланади.
Агар ишсиз фуқаро 35 ёшга тўлмаган эркак бўлиб, унинг қарамоғидагилар сони 3 нафаргача бўлса, у ишсизлик нафақаси олиш учун ҳақ тўланадиган жамоат ишларида белгиланган тартибда иштирок этиши талаб этилади.
Ишсизлик нафақаси миқдори қанча?
Ўзбекистонда 23 октябрь куни «Аҳоли бандлиги тўғрисида» қонун қабул қилинди. 3 ойдан кейин кучга кирадиган қонунга асосан, ишсизлик нафақалари қуйидаги миқдорларда оширилади:
- ишдан ва иш ҳақидан сўнгги 12 ойлик давр ичида маҳрум бўлган шахсларга – аввалги иш жойидаги ўртача ойлик иш ҳақининг 50 фоизи миқдорида, лекин меҳнатга ҳақ тўлашнинг энг кам миқдори (679 330 сўм)дан оз бўлмаган миқдорда (амалдагиси – МҲЕКМнинг 35,2 фоизидан оз бўлмаган миқдорда);
- ишдан ва иш ҳақидан маҳрум бўлган ҳамда узоқ (12 ойдан ортиқ) танаффусдан кейин меҳнат фаолиятини қайта бошлашга ҳаракат қилаётган шахсларга – МҲЕКМнинг 1 баравари миқдорида (амалдагиси – МҲЕКМнинг 26,5 ва 35,2 фоизидан оз бўлмаган миқдорларда);
- илгари ишламаган, биринчи марта иш қидираётган шахсларга – МҲЕКМнинг камида 75 фоизи миқдорида (амалдагиси – МҲЕКМнинг камида 26,5 фоизи миқдорида). Иш стажини ҳужжат билан тасдиқлаш имконияти бўлмаган шахсларга ҳам шу миқдорда нафақа тўланади.
Аввалроқ Ўзбекистонда январь–июнь ойларида ҳам ишсизлик даражаси 13,2 фоизни ташкил этгани хабар қилинганди.
Изоҳ (0)