Qashqadaryo viloyatida yashovchi, ayoli bilan ajrashgan fuqaro 3 nafar voyaga yetmagan farzandi uchun undirilishi kerak bo‘lgan aliment pulini oldindan to‘ladi, deb xabar bermoqda Majburiy ijro byurosi “Daryo”ga.
Ma’lum qilinishicha, fuqarolik ishlari bo‘yicha Chiroqchi tuman sudining 2020-yil 9-oktabrdagi sud buyrug‘iga asosan, qarzdor O.T.dan undiruvchi N.J. foydasiga 3 nafar voyaga yetmagan farzandining moddiy ta’minoti uchun ular voyaga yetgunga qadar har oy jami daromadining yarmi miqdorida aliment undirish belgilangan edi.
Ushbu sud buyrug‘i Majburiy ijro byurosi Chiroqchi tuman bo‘limi ish yurituviga 13-oktabr kuni kelib tushdi va shu kunning o‘zida ijro ishi yuritishni qo‘zg‘atish to‘g‘risida qaror qabul qilinib, taraflarga yuborildi.
Taraflar 27-oktabr kuni o‘zaro kelishuv bitimini imzolashdi. Unga ko‘ra, qarzdor farzandlari 18 yoshga to‘lgunga qadar bo‘lgan jami 259 million 250 ming so‘mni biryo‘la to‘lab berdi.
Shu sababli ushbu ijro hujjati amalda tamomlandi.
Avvalroq Buxorolik erkak ikki xotiniga birdaniga 810 million so‘mdan ortiq alimentni oldindan to‘lab bergani, Qashqadaryoda 4 nafar farzandi uchun aliment to‘lovchi ota Damas’ini sobiq xotinining nomiga rasmiylashtirib bergani va Nukusda karantin sabab aliment to‘lay olmay qolgan ota ikki uyidan birini farzandining nomiga o‘tkazib bergani haqida xabarlar berilgandi.
Izoh (0)