Jizzax viloyatining Zarbdor tumanida “Jiguli” va eshak arava o‘rtasida sodir bo‘lgan yo‘l-transport hodisasi oqibatida ikki kishi halok bo‘ldi. Bu haqda IIV YHXBB axborot xizmati xabar berdi.
Ma’lumotlarga ko‘ra, 27-oktabr kuni soat 19:50 larda Yangiyer—Dashtobod avtomobil yo‘lining 35 kilometrida 1999-yilda tug‘ilgan fuqaro “VAZ-2106” rusumli transport vositasini katta tezlikda boshqarib borayotib, yo‘lning o‘ng tomonidan harakatlanib kelayotgan eshak aravaning orqa tomoniga urilgan.
Natijada eshak aravada bo‘lgan 1958-yilda tug‘ilgan X.E. hamda 1998-yilda tug‘ilgan A.P. turli darajadagi tan jarohatlarini olib, Zomin tuman tibbiyot birlashmasiga yotqizilgan. Ko‘rsatilgan tibbiy muolajalarga qaramasdan jabrlanuvchilar vafot etgan.
Hozirda mazkur holat yuzasidan Zarbdor tumani IIB huzuridagi tergov bo‘limi tomonidan tergov harakatlari olib borilmoqda.
Avvalroq Buxoroda Damas eshak aravani urib yuborishi oqibatida 25 yoshli ayol vafot etgani to‘g‘risida xabar berilgandi.
Izoh (0)