Parkentdagi “kichkina Sardoba” yuz bergan hududga mahalliy ma’muriyat tomonidan yordam ko‘rsatilishi ma’lum qilindi

2020-yilning 20-oktabr kuni Parkent tumani “Aviasozlar” bog‘dorchilik-uzumchilik shirkati hududidagi aholini ichimlik suvi bilan ta’minlaydigan suv yig‘ish rezervuarining yorilishi oqibatida suv toshqini sodir bo‘lgandi. Toshkent viloyati hokimligi axborot xizmati Parkentdagi hodisa yuzasidan ma’lumotlarni e’lon qildi.

Qayd etilishicha, shirkat 629 ta dala hovliga xizmat ko‘rsatadi. Shirkat hududidagi 1977-yilda qurilgan suv yig‘ish rezervuari (2000 metr kub sig‘imga ega) ko‘p yillardan beri foydalanilganligi bois ta’mirtalab holatga kelgan, avariya holati temir konstruksiyalarining mustahkamlik darajasi yo‘qolganligi tufayli ro‘y bergan.

Oqibatda 17 ta dala hovliga suv kirgan. Xususan, rezervuar yaqinida joylashgan 7 ta dala hovliga jiddiy zarar yetgan.

Jumladan, toshqin Rahmatullayeva Gulnora, Mirzeva Irina, Dobroyenka Kira, Shironova Yevgeniya, Maxsumov Dovudxon, Abdullayeva Marhamat va Ashurova Bumayramga tegishli dala hovlilarning asosiy binolariga jiddiy ziyon keltirgan. Uyning yashash xonalari, oshxona, hammom, hojatxona va bostirmasi tiklab bo‘lmaydigan darajaga kelgan.

“Bugungi kunda Parkent tumani hokimligi tomonidan tezkor choralar ko‘rilmoqda. Shirkat rahbari Ulug‘bek Abdullayev tomonidan zarar ko‘rgan 7 ta dala hovlini tiklash ishlariga kirishilgan.

Parkent tumani hokimligi tashabbusi bilan aholiga amaliy yordam ko‘rsatish maqsadida tuman mahalla va oilani qo‘llab-quvvatlash bo‘limi, korxona va tashkilotlar rahbarlaridan iborat komissiya tuzildi.

Komissiyaga tuman hokimining birinchi o‘rinbosari, moliya bo‘limi, tuman bosh me’mori, yer resurslari va ko‘chmas mulk kadastri, bandlikka ko‘maklashish markazi, uy-joy kommunal xizmat ko‘rsatish bo‘limi mutasaddilari kirgan bo‘lib, ular shirkat rahbari va shirkat a’zolari bilan ko‘rilgan zarar miqdorini aniqlashadi. Albatta, zarar ko‘rgan dala hovlilarning bino va inshootlarini ta’mirlash choralari ko‘riladi”, – deyiladi xabarda.

Hokimlik xabariga ko‘ra, tuman elektr tarmoqlari, gaz ta’minoti, “Suvoqova” filiali korxonalari tomonidan sohalar bo‘yicha ta’minot tizimlarining holati o‘rganilib, zarar ko‘rgan dala hovlilarda kommunal tarmoqlarni tiklash-ta’mirlash ishlarga kirishilgan.

Shuningdek, tuman sanitariya-epidemiologik osoyishtalik markazi, mahalla va oilani qo‘llab-quvvatlash bo‘limi xodimlari tomonidan aholi orasida turli xil kasalliklar kelib chiqmasligi uchun profilaktik tadbirlar olib borilmoqda.