Farg‘ona viloyatida 2020-yilning o‘tgan to‘qqiz oyi davomida sodir bo‘lgan 635 ta YTHda 150 nafar fuqaro halok bo‘lgan. Ushbu YTHlarning 29 foizi velosipedchilar ishtirokida sodir etilgan. Bu haqda “Daryo”ga viloyat IIB axborot xizmati xabar berdi.

Qayd etilishicha, 2020-yilning to‘qqiz oyi davomida velosipedchilar ishtirokida 186 ta yo‘l-transport hodisasi sodir etilib, ushbu hodisalarda 38 nafar fuqaro halok bo‘lgan, 155 nafar fuqaro turli darajada tan jarohati olgan.

Shu sababdan viloyat Yo‘l harakati xavfsizligi boshqarmasi xodimlari tomonidan olib borilayotgan targ‘ibot-tashviqot tadbirlarida mototransport va velosipedchilarga alohida e’tibor qaratilmoqda. Ular bilan profilaktik suhbatlar o‘tkazilib, mototransport haydovchilariga motoshlemlar hamda velosipedchilarga tungi vaqtlarda nur qaytaruvchi nimchalar, velosipedlarga esa nur qaytaruvchi jihozlar tarqatilmoqda.

Ogohlantirishlarga qaramasdan sutkaning qorong‘i vaqtlarida yoritish chiroqlarisiz, nur qaytaruvchi vositalar bilan jihozlanmagan, shuningdek, mast holda velosiped boshqargan fuqarolarni aniqlash tadbirlari o‘tkazilmoqda.

Jumladan, 2020-yilning 20-oktabridan 22-oktabr kuniga qadar 489 ta velosiped aniqlangan kamchiliklarni bartaraf etish maqsadida vaqtinchalik jarima maydoniga olib kirilgan. 13 nafar fuqaroga esa mast holda velosipedda harakatlangani uchun tegishli tartibda chora ko‘rilgan.

Eslatib o‘tamiz, avvalroq Ichki ishlar vazirligi Yo‘l harakati xavfsizligi bosh boshqarmasi O‘zbekistonda 2020-yilning 8 oyida velosipedlar ishtirokida yuz bergan YTHlarda 143 kishi halok bo‘lganini ma’lum qilgandi.