Rossiyada so‘nggi sutkada 16 550 kishida koronavirus aniqlandi, deb xabar bermoqda Meduza, koronavirusga qarshi kurashish tezkor shtabning 27-oktabrdagi ma’lumotiga tayanib. Bu bir kun avval qayd etilgan holatlardan 797 taga kam bo‘lib, shu kuni rekord darajada — 17 347 kishida COVID-19 aniqlangandi.
Yangi aniqlangan kasallanish holatlarining eng ko‘pi Moskva ( +4312 kishi), Sankt-Peterburg (+721) va Moskva viloyatida (+496) qayd etilgan.
Mamlakatda kasallanganlarning umumiy soni 1 547 774 nafarga yetdi.
Sutka davomida COVID-19 bemorlarining 320 nafari, pandemiya boshlanganidan buyon esa 26 589 nafari vafot etgan. Bundan avval koronavirusdan o‘lim holatlari sonining yuqori bo‘lishi 21-oktabr kuni kuzatilgan, shu kuni sutka davomida 317 kishi vafot etgandi.
Sog‘ayganlar soni esa 1 158 940 nafarni tashkil etmoqda, shu jumladan, bemorlarning 12 844 nafari so‘nggi bir kecha-kunduzda tuzalib, kasalxonadan javob berilgan.
“Rospotrebnadzor” ma’lumotlariga ko‘ra, Rossiyada koronavirusni aniqlash bo‘yicha so‘nggi 24 soat davomida 402 mingta, umumiy hisobda esa 58,2 milliondan ortiq test o‘tkazilgan.
Rossiyada jami kasallanganlar soni 1,5 milliondan oshganiga qaramay, hukumat mamlakatda koronavirus tarqalishi tufayli qat’iy cheklovlarni joriy qilishni rejalashtirmayapti. “Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.
“Rospotrebnadzor” Epidemiologiya markaziy ilmiy-tadqiqot instituti direktorining tadqiqot ishlari bo‘yicha o‘rinbosari Aleksandr Gorelov Rossiyada mart oyigacha koronavirus bilan kasallanishlar soni kamayishini taxmin qilgan. Gamaleya nomidagi Milliy epidemiologiya va mikrobiologiya ilmiy-tadqiqot markazi yashirin infeksiyalar mikrobiologiyasi bo‘limining sobiq rahbari, professor, virusolog Viktor Zuyev esa mamlakatda epidemiologik vaziyat 2021-yil yozida barqarorlashadi, degan fikrda.
Izoh (0)